बेनी नगरपालिका वडा नं ६ बगुवाखोलामा अवस्थित बौद्धिक अपांगता स्रोत कक्षामा अध्ययन गर्ने बौद्धिक अपाङ्ग बालबालिकालाई दैनिक उपभोग्य खाद्यान्न सामग्रीहरु सहयोग भएको छ । बेनी नगरपालिका–७, हुलाकचोक निवासी राममायाँ श्रेष्ठले आफ्नो जन्मदिनको अवसरमा सहयोग गर्नुभएको हो ।

उक्त सामग्रीहरु श्रेष्ठले विद्यालयका प्रधानाध्यापक धनबहादुर खत्रीलाई हस्तान्तरण गर्नुभएको थियो । कार्यक्रममा विद्यालय ब्यवस्थापन समिति, शिक्षक लगायतको विशेष उपस्थिति रहेको थियो । बौद्धिक अपांगता स्रोत कक्षामा सरकारी सहयोग बाहेक ब्यक्तिगत तथा संस्थागत सहयोगले सहज भएको प्रअ खत्रीको भनाई छ ।

बेनी नगरपालिकाले डम्पिङ साइटको खोजी सुरु गरेको छ । बढ्दो बजारीकरणसँगै नगरपालिकाले फोहर व्यवस्थापन गर्न डम्पिङ साइडका लागि उचित ठाउँ नपाउँदा लामो समयदेखि कालीगण्डकी नदीको किनारभन्दा माथि र बेनी–गलेश्वर सडकभन्दा तल बिर्सजन गर्ने गरिएको अवस्थामा अब डम्पिङ साइटको खोजी गरी स्थायी रुपमा फोहोर ब्यवस्थावन गर्ने नगरपालिकाले जनाएको छ ।

नगरकार्यपालिकाको पहिलो बैठकले नगरप्रमुख सुरत केसीको संयोजकत्वमा उपप्रमुख ज्योति लामिछाने, वडा नं २, ३ र ४ का अध्यक्ष क्रमश यामबहादुर कार्की, पदम पुन,भगवान खड्का, कृष्णसिंङ बानियाँ र चक्रबहादुर केसी सदस्य रहेको समिति गठन गरिएको छ ।

सडक नजिक फोहोर फाल्दा त्यसले नकारात्मक सन्देश दिने भएकाले सडक तथा बस्तीभन्दा टाढा लगेर फोहोर ब्यवस्थापन गर्न स्थानीयले माग गरे पनि सुनुवाई नभएको अवस्थामा यसपटक डम्पिक साइटका लागि प्रस्तावित क्षेत्रका बासिन्दासँग छलफल गर्ने नगरपालिकाले जनाएको छ ।

यसअगाडी्र प्रस्तावित स्थानमा प्रभावित क्षेत्रका बासिन्दाको अबरोधले अगाडी बढ्न नसकेको अवस्थामा बस्तीभन्दा टाढाको स्थानको खोजी भइरहेको नगरप्रमुख केसीको भनाई छ ।

अघिल्लो कार्याकालमा जनप्रतिनिधिले ठाउँ खोज्न असफल भएपछि बजेट विनियोजन गरेपनि फ्रिज गरेपनिनयाँ विधिबाट फोहोर व्यवस्थापन गर्न वडा नम्बर ७ र ८ मा पर्ने बेनी बजारका घरबाटै कुहिने र नकुहिने फोहोर छुट्टाछुट्टै भाँडोमा संकलन र व्यवस्थापन गरिएको थियो । नगरपालिकाले रातोपहिरोमा ३ वर्षअघि फोहोर व्यवस्थापन केन्द्र निर्माण गरेको थियो ।

हिन्दू धर्मका विभिन्न धार्मिक शास्त्रमा समेत कालिगण्डकी नदीलाई पवित्र नदीको रुपमा उल्लेख गरेको पाइन्छ । त्यसैले अझै हिन्दू धर्मालम्बीहरू विभिन्न चाडपर्व सहित सम्भव भएसम्म दैनिकरुपमै यस नदीमा स्नान गरेर आफूलाई धन्य भएको महसूस गर्छन् ।

तत्कालिन समयमा फोहोर बिर्सजनका बिरुद्धमा पुनरावदेन अदालतमा मुद्धा समेत हालिएको थियो ।तत्काल फोहोर उचित स्थानमा ब्यवस्थापन गर्न दिएको आदेशको ब्यवहारिक कार्यान्वयन हुन सकेको छैन । रातोपहिरोमा सार्वजनिक जग्गा सम्याएर भवन बनाइएको अस्थायी संरचनामा फोहोर बिसर्जन गर्न लागेको एकदशकभन्दा बढी भइसकेको अवस्थामा नव निर्वाचित जनप्रतिनिधिले प्राथमिकतामा राखेर डम्पिङ साइडको खोजी गर्न प्रभावित क्षेत्रका बासिन्दाले पटकटपक माग गरेका छन् ।

म्याग्दीको बेनी नगरपालिका–३ चिनाखेतका मनबहादुर पुनको घरमा एक वर्षअघि नै मिटर र धारा जडान भएको थियो ।“पाइप ल्याएर मिटर र धारा जोडेपनि पानी आएको छैन”, उहाँले भन्नुभयो “इन्टेक, टङ्की, मुख्य र वितरण पाइपलाइन निर्माणले पूर्णता नपाउँदा खानेपानी योजना अलपत्र बनेको छ ।” मनबहादुर मात्र नभएर मिटर र धारा जोडेका चिनाखेतका ७६ घरधुरीको धाराबाट खानेपानी उपभोग गर्ने सपना पूरा भएको छैन ।

उनीहरुले पुरानो योजनाको सार्वजनिक धाराबाट खानेपानी उपभोग गर्दै आएका छन् । सार्वजनिक धाराबाट घरघरमा पानी लैजान व्यक्तिगत लगानीमा पाइप जोडेका छन् । पुरानो धारामा नियमित खानेपानी आउँदैन ।

धारामा पानी नआउँदा खोल्सा र कुँवाको पानी उपभोग गर्नुपर्ने चिनाखेतवासीले बताएका छन् । लागत अनुमान, डिजाइन र ठेक्का सम्झौतामा उल्लेख भएको गुणस्तर र मापदण्डअनुसार मुहान, टङ्की, पाइपलाइन निर्माण नभएकाले चिनाखेत खानेपानी आयोजना सफल नभएको स्थानीयवासीको भनाइ छ ।

बेनी नगरपालिकाले सङ्घीय सरकारको अनुदानमा आर्थिक वर्ष २०७७-७८ मा चिनाखेत खानेपानी योजना बनाउन सुन्दर निर्माण सेवासँग रु ५१ लाख ५४ हजार ४० मा ठेक्का सम्झौता गरेको थियो ।

७० लाख विनियोजन भएको योजना प्रतिस्पर्धाका क्रममा रु १८ लाखभन्दा बढी घटेर ठेक्का पारेको थियो । २० घनमिटर क्षमताको दुई वटा रिजर्भ टङ्की, तीन किलोमिटर मुख्य पाइपलाइन, मुहानमा दुई वटा इन्टेक बनाउने, मिटर र धारा वितरण गर्ने सम्झौता थियो । रिजर्भ टङ्कीदेखि आरविटीसम्म नौ किलोमिटर वितरण लाइन बनाएका छन् ।

“असार मसान्तमा हतार हतारमा काम गरेका थिए । कागजमा योजना सम्पन्न भएको भनिए पनि व्यवहारमा बनेको छैन”, स्थानीयवासी दीपक पुनले भन्नुभयो, “बनाउनुपर्ने ठाउँ र सङ्ख्यामा मुहानमा इन्टेक बनेको छैन ।

रिजर्भ टङ्कीमा अहिलेसम्म पानी नहालिनुमा त्यसको गुणस्तरमा प्रश्न उठेको छ ।” उहाँका अनुसार वितरण लाइनदेखि घरघरमा पानी पुर्याउने पाइप जडान गर्ने आरविटी हिलोले भरिएका छन् । निर्माण कार्यलाई पूर्णता नदिइ अधकल्चो बनाएर छाडिएको खानेपानी योजनाका संरचना प्रयोगमा आउन सकेको छैन ।

बेनी नगरपालिकाका इञ्जिनीयर बिमलरञ्जन कार्कीले डिजाइन, लागत अनुमान र ठेक्का सम्झौता अनुसार गरेको कामको मूल्याङ्कनको आधारमा भुक्तानी दिइएको र चालु आर्थिक वर्षमा बजेट विनियोजन नभएकाले बाँकी काम हुन नसकेको बताउनुभयो ।

अन्तिम नाप जाँचका क्रममा आयोजनामा पानी चलाएर परीक्षण गर्दा ठीक भएको उहाँको भनाइ छ । बेनपा–३ भकिम्लीका वडाध्यक्ष पदम पुनले निर्माण व्यवसायी र प्राविधिकको कमजोरीले गर्दा चिनाखेत खानेपानी आयोजना अलपत्र बनेको बताउनुभयो ।

“घरघरमा खानेपानी वितरण गर्ने लक्ष्य र उद्देश्यले बजेट र योजना भित्र्याए पनि ठेक्कामार्फत कार्यान्वयन गर्दा प्रभावकारी हुन सकेन”, उहाँले भन्नुभयो, “यो योजनालाई आगामी वर्ष थप बजेट व्यवस्थापन गरेर पूर्णता दिने र सञ्चालन गर्न नगरपालिकामा छलफल चलाएको छु ।”–रासस

म्याग्दीको मंगला गाउँपालिका–५,अर्मनमा जन्मिएका प्रकाश दुतराजको नयाँ म्यूजिक भिडियो ‘मन भुल्छ’ बजारमा आएको छ । पछिल्लो समय चर्चाको शिखरमा रहेका दुतराजले मंगलबार नयाँ म्यूजिक भिडियो बजारमा ल्याएका हुन् । जाम भो माईली एल्बमको ‘लाहुर जाने रेलैमा’ बोलको गीतबाट नेपालका चल्तीका गायकमा आफ्नो नाम सुरक्षित गर्न सफल दुतराजले नयाँ प्रस्तुतीमा पनि उस्तै साथ र सहयोगको अपेक्षा गरेको बताए ।

‘मन भुल्छ’ बोलको गीतमा दुतराजलाई गायिका शान्तीश्री परियारले साथ दिएकी छन् भने समुह गायनमा बसन्त विश्वकर्मा, प्रकाश यश, रुपी शिंजाली, प्रेमा रानाले साथ दिएका छन् । दुतराजका गीत बालबालिका देखि बृद्धबृद्धासम्मको जिब्रोमा झुण्डिने गरेको छ । उनका हरेक रचनामा फरक स्वाद हुने भएकाले नै संगीतका पारखीले उनलाई नै खोज्छन्। त्यसैको परिणाम उनका पछिल्ला गीतहरूले यूटुवमा मनग्य कमाइरहेको छ ।

साधारण र हसिलो स्वभावका दुतराजले सबै उमेर समुहकालाई लक्षित गरी गीतहरू पस्किने भएकाले नै लामो समयसम्म जिब्रोमा भुण्डिने गरेको छ । उनको आरने, बैनी झ्यालैमा, घर कता हो बैनीको, पछ्यौरीको तातो, तिरिरि मुरली बज्यो तारेभीर,फूल लाउँथें शिरमा, अहिले चर्चामा आएको गीत जाम भो माइलीमा मानवीय र सामाजिक सन्देश लुकेको छ ।

बेनी नगरपालिकामा आज (मङ्गलवार) एक कार्यक्रमबीच संस्थाबाट सञ्चालनमा रहेका कार्यक्रमको बारेमा सेयरिङ सम्पन्न भएको छ । युएसआईडीको आर्थिक सहयोगमा मिलन म्याग्दीद्वारा सञ्चालित सुआहारा कार्यक्रम तथा सामुदायिक झोलुङ्गे पुल कार्यक्रमको विषयमा सेयरिङ तथा जानकारी गराइएको हो ।

गएको वैशाख ३० गते सम्पन्न स्थानीय तहको दोस्रो निर्वाचनबाट निर्वाचित जनप्रतिनिधिसँग परिचयात्मक कार्यक्रमसहित जिल्लामा संस्थामार्फत सञ्चालित कार्यक्रमहरुको बारेमा जानकारी गराउने उद्देश्यले कार्यक्रम गरिएको मिलन म्याग्दीले जनाएको छ । कार्यक्रममा मिलन म्याग्दीका कार्यकारी निर्देशक दिलमाया बिटालु र सुआहारा कार्यक्रमका फिल्ड संयोजक बालकुमारी पुनले सञ्चालित कार्यक्रमबारे जानकारी गराउनुभएको थियो ।

यसैगरी झोलुङ्गे पुलको प्राविधिक यामबहादुर विश्वकर्माले बेनी नगर क्षेत्रमा निर्माणाधीन अवस्थामा रहेका सामुदायिक झोलुङ्गे पुलको बारेमा पनि जानकारी गराउनुभएको थियो । सोही अवसरमा पालिकाका नवनिर्वाचित जनप्रतिनिधिलाई बधाई ज्ञापनसहित सुआहारा कार्यक्रमको तर्फदेखि बधाई तथा शुभकामना–पत्र प्रदान गरिएको थियो ।

कार्यक्रममा बेनी नगरपालिकाका प्रमुख सुरत केसीले समुदायका महिला एवं बालबालिकाहरुको पोषण अवस्था सुधार गर्न र झोलुङ्गे पुल निर्माणको कार्यमा गैरसरकारी संस्थासँग आवश्यक सहकार्य गरिने बताउनुभयो ।

कार्यक्रममा बेनी नगरपालिकाका प्रमुख प्रशासकीय अधिकृत धोलकराज ढकाल, प्रवक्ता रमेशकुमार श्रेष्ठ, बेनी नगरपालिका–६, अर्थुङ्गेका वडा अध्यक्ष कृष्णबहादुर बानियाँ, इन्जियिनर विमलरञ्जन कार्की, योजना अधिकृत प्रकाश सुवेदी, असिस्टेन्ट सव–इन्जिनियर चन्द्रबहादुर थापा, मिलन म्याग्दीका अध्यक्ष कमला बानियाँ थापालगायत कार्यसमितिका पदाधिकारी र कर्मचारीको उपस्थिति रहेको थियो ।

यसअघि मिलन म्याग्दीको आयोजनामा मंगला गाउँपालिका र अन्नपूर्ण गाउँपालिकामा पनि संस्थामार्फत सञ्चालित कार्यक्रमहरुको बारेमा जनप्रतिनिधि र कर्मचारीहरुको बीचमा सेयरिङ कार्यक्रम सम्पन्न भैसकेको छ । सन् २०१२ देखि म्याग्दीमा सञ्चालित सुआहारा कार्यक्रमको अहिले दोस्रो चरण सञ्चालनमा रहेको छ ।

बेनी नगरपालिकाले मजदुरको सेवासुविधा र सुरक्षाको प्रत्याभुति दिलाउन मजदुर डेस्क तथा सहायता कोषको स्थापना गरेको छ ।

नगर कार्यपालिकाको पहिलो बैठकको निर्णय सार्वजनिक गर्न आयोजित पत्रकार सम्मेलनमा नगरभित्र कार्यरत मजदुरको गुनासो र समस्या समाधान गर्न आगामी आवदेखि सञ्चालन गरिने भएको छ ।

नगरभित्र विभिन्न क्षेत्रमा कार्यरत मजदुरको हकहित, सेवासुविधा, सिप हस्तान्तरण र अधिकारको सुरक्षा र व्यवस्थापन गर्ने उद्देश्यका साथ डेक्स र कोषको स्थापना गरिएको नगरपालिकाका मेयर सुरत केसीले बताए ।

उनका अनुसार मजदुरको नाममा हुने बिचौलीयाको अन्त्य गर्न हेल्प डेक्सको आवश्यकता रहेको बताए।डेस्क र कोष स्थापनाका लागि आवश्यक पर्ने कार्यविधिको समेत तयारी गरिएको छ ।

‘मजदुरका हरेक समस्याको समाधानमा प्रतिबद्ध छौ,‘रोजगारी प्रर्बधनमा पनि सघाउँछौ’ मेयर केसीले भने । हेल्प डेस्कले श्रमिकहरुको सुचिकरण, वर्गिकरण र उचित व्यवस्थापन गर्दै सेवासुविधा नपाएको अवस्थामा आवश्यक सहजिकरण समेत गर्ने छ ।

कोषमा नगरपालिकाबाट तत्काल ५ लाख जम्मा गरिएको छ भने विभिन्न निकायहरूबाट समेत सहयोग जुटाएर कोष बृद्धि गरिने जनाइएको छ ।श्रमिक अथवा श्रमदातालाई हेल्प डेस्कमा दर्ता गरेको उजुरीलाई तत्काल समाधानको उपाय खोजिने उपमेयर ज्योति लामिछाने पौडेलले बताईन् । नगरपालिकाले स्थापना गरेको कोषमा इच्छुक सहयोगदाताले सहयोग समेत गर्न सक्ने, कोषलाई बृद्धि गदैं लैजाने लगायतका प्रावधान समेत राखिने जनाइएको छ ।

नगरभित्र रोजगारीको खोजीमा रहेकालाई समेत डेस्कमार्फत रोजगार खोजिदिने तथा दुर्घटनामा घाईतको उपचार तथा मृत्यु भएको अवस्थामा समेत राहत सहितका सुविधालाई समेत ध्यान दिइएको नगरका प्रबक्ता रमेशकुमार श्रेष्ठले बताए ।

श्रमिक, रोजगारदाता विचको आपसी सम्बन्धमा आएका समस्यालाई मात्रै नभई नमुना कार्य र अनुभव आदानप्रदान सहित मजदुर दिवस सहित विभिन्न कार्यक्रमहरूमा सहजीकरण गर्ने जनाइएको छ ।

बेनी नगरपालिकाभित्र दुर्घटनामा ज्यान गुमाउने मजदुरको परिवारले प्राप्त गर्ने सेवासुविधा श्रम ऐनभन्दा पनि कम भएको गुनासो आउने गरेको अवस्थामा डेस्क तथा सहायता कोषले सहज हुने नेपाल टे«ड युनियन महासंघ (जिफन्ट) बेनी नगर कमिटीका सचिव अर्जुन रानाले बताए ।

उनले विगतमा ठेकेदार, जिल्लाका सरकारी निकायबाट समस्या समाधान गर्नुपर्ने अवस्थामा नगरपालिकाले नै डेस्कको स्थापना गरेपछि सहज भएको बताए । म्याग्दीका अन्य स्थानीय तहमा समेत डेस्क स्थापनाको माग गरिएको छ ।

बेनी नगरकार्यपालिकाको पहिलो बैठकले लोकप्रिय कार्यक्रम सहित १६ निर्णय गरेको छ । सोमबार सम्पन्न भएको कार्यपालिकाको बैठकले विभिन्न ५ विषयगत समितिको गठन, सामुदायिक विद्यालयको शैक्षिक गुणस्तर अभिबृद्धिका लागि सुझाव पेश गर्न कार्यदल गठन गर्ने निर्णय गरेको छ ।

नगर कार्यपालिकाको पहिलो बैठकको निर्णय सार्वजनिक गर्न आयोजित पत्रकार सम्मेलनमा राजश्वको स्रोत पहिचान, नगरपालिका भित्र सञ्चालित हुने योजनाहरुको अनुगमन, कर्मचारीको सेवासुविधा सहित कार्यसम्पादन, मजदुर डेक्स तथा कोष स्थापना, विपद्मा मेयर कार्यक्रम, आमा समुहलाई आयआर्जनमा जोड्ने आमा समुहसँग उपमेयर कार्यक्रम सञ्चालन गर्ने निर्णय गरिएको प्रबक्ता रमेशकुमार श्रेष्ठले बताउनुभयो ।

उहाँका अनुसार नगरकार्यपालिकाको निर्णय कार्यान्वयनमा आइसकेको र आगामी आवदेखि कार्यान्वयन हुने कार्यक्रमहरुको तयारीका लागि समे निर्देशन दिइएको बताउनुभयो। नगरपालिकाले आगामी आवमा नगर प्रहरी भर्ना गर्ने गरी नगरप्रहरी सञ्चालन तथा ब्यवस्थापन कार्यविधि समेत बनाउने निर्णय गरेको छ ।

पत्रकार सम्मेलनमा मेयर सुरत केसीले नगरपालिकाको सम्रग विकासका लागि सबै दलबाट प्रतिनिधित्व गर्नुभएका जनप्रतिनिधिको साझा प्रस्तावहरू कार्यान्वयन गरिने बताउनुभयो । उहाँले विषयगत समिति गठन सहितका अन्य प्रस्ताव सर्वसम्मतले पारित भएको बताउनुभयो ।

सोही अवसरमा उपमेयर ज्योति लामिछानेले आमा समुहका भवनलाई आयर्आजनसँग जोड्ने बताउनुभयो । उहाँले नगरपालिका भित्रका आमा समुहलाई उत्पादनमुखी योजनाहरूमा सहभागी गराउने बताउनुभयो । पत्रकार सम्मेलनमा प्रमुख प्रशासकीय अधिकृत ढोलकराज ढकाल, अधिकृत कलम सुबेदीको उपस्थिती रहेको थियो ।

बेनी नगरपालिकाले खेतीयोग्य जमिनभित्र रहेको अनावश्यक रुख कटान गर्ने भएको छ । खेतीयोग्य जमिन बाँझो र अनावश्यक रुखले झाँडीले भरिने क्रम बढेपछि उर्भरयोग्य जमिन जंगलमा परिणत हुनबाट जोगाउन रुख कटान गरिने नगरपालिकाले जनाएको छ ।

नगर कार्यपालिकाको पहिलो बैठकको निर्णय सार्वजनिक गर्न आयोजित पत्रकार सम्मेलनमा उपमेयर ज्योति लामिछाने पौडेलले बाँझो जमिन सदुपयोग र खेती गरिरहेको जमिनमा पनि रुखविरुवा भरिएपछि पहिल्यजस्तो उत्पादन हुन छोडेको अवस्थामा रुख कटान छटान सम्बन्धि कार्यविधि बनाएर अगाडी बढ्ने निर्णय गरिएको बताउनुभयो ।

‘बनजंगल, झाँडीले भरिएको छ, यो समस्या समाधानको आवश्यकता थियो’ उपमेयर लामिछानेले भन्नुभयो । उर्भरभूमिमा धान, मकै, कोदो लगायतको रैथानीबाली लोप हुने अवस्थामा पुगेको अवस्थामा किसानको समस्यालाई मध्यनजर गरी कार्यविधिमार्फत समस्या समाधान गरिने नगरपालिकाले जनाएको छ। खेतीयोग्य जमिनमा टुनी, चिमल, मौवा, उत्तिस, बास लगायतको रुखविरुवा भरिएको छ । यसैबीच नगरप्रहरीका लागि समेत कार्यविधि बनाइने निर्णय भएको प्रबक्ता रमेशकुमार श्रेष्ठले बताउनुभयो ।

खाद्यान्न बालीको सुरक्षा र उत्पादन वृद्धि गर्नका लागि म्याग्दीका किसानहरुलाई उन्नत जातको मकैको बिउ वितरण गरिएकाे छ। किसानलाई पालिकामार्फत ५० प्रतिशत अनुदानमा मकैको बिउ वितरण गरिएको हो ।

चालु आर्थिक वर्ष २०७८/७९ को ससर्त खाद्यान्न बाली उन्नत बिउ उपयोगमा मूल्य अनुदान कार्यक्रमअन्तर्गत किसानहरुलाई अनुदानमा मकैको बिउ वितरण गरिएको पालिकाले जनाएका छन् । ग्रामीण भेगका किसान, कृषक समूह र कृषि सहकारी सङ्घसंस्थाको मागअनुसार  मकैको बिउ वितरण गरिएको छ ।

छ वटा पालिका रहेको म्याग्दीमा यसवर्ष बेनी नगरपालिका र पश्चिम म्याग्दीको मङ्गला गाउँपालिकाले किसानहरुलाई मकैको बिउ वितरण गरेका छन् । खाद्यसुरक्षा तथा खाद्यान्न बालीको उत्पादन वृद्धि गर्ने उद्देश्यले मकैको बिउ खरिद गरेर वितरण गरिएको बेनी नगरपालिकाको कृषि शाखाका प्रमुख आकृति ढुङ्गानाले बताउनुभयो । चितवनको रामपुरबाट अरुण–२ र मनकामना–३ नामक उन्नत जातको मकैको बिउ खरिद गरेर किसानलाई वितरण गरिएको छ ।

बेनी र मङ्गला गरी म्याग्दीका दुई पालिकामा मात्रै चालु वर्षमा बजेट र कार्यक्रम आएको हुँदा ससर्ततर्फ खाद्यान्न बाली उन्नत बिउ उपयोग मूल्य अनुदान कार्यक्रममार्फत किसानलाई अनुदानमा मकैको बिउ वितरण गरिएको जनाइएको छ । गएको फागुन, चैत र वैशाख महिनाको पहिलो हप्तासम्म किसानहरुको माग र आवश्यकताअनुसार मकैको बिउ उपलब्ध गराइएको कृषि शाखा प्रमुख ढुङ्गानाले जानकारी दिनुभयो ।

बेनी नगरपालिकामा मात्रै कुल ८ सय ६६ केजी मनकामना र अरुण जातको मकैको बिउ खरिद गरेर वितरण गरिएको बेनी नगरपालिकाको कृषि शाखाले जनाएको छ । बेनी नगरको विभिन्न वडामा उन्नत जातको मनकामना ४ सय ६८ केजी र अरुण ३ सय ९८ केजी मकैको बिउ वितरण भएको छ । कुल १० वटा वडा रहेको म्याग्दीको बेनी नगरपालिकाको ७ र ८ नम्बर वडा बेनीबजारबाहेक अन्य ८ वटा वडामा सबैखाले कृषि उपजको उत्पादन हुँदै आएको छ ।

त्यस्तै पश्चिम म्याग्दीको मङ्गला गाउँपालिकाले भने मनकामना जातको ८ सय ६० केजी मकैको बिउ खरिद गरेर वितरण गरेको जनाएको छ । पालिका भित्रका कृषि कार्म तथा कृषि सहकारी र किसानहरुलाई मागको आधारमा बिउ खरिद गरेर वितरण गरिएको कृषि शाखाका प्राविधिक सहायक प्रशान्त पौडेलले जानकारी दिनुभयो।

जिल्लाको बेनी नगरपालिकाभित्र रत्नेचौर, ज्यामरुककोट, पुलाचौर, सिङ्गा, घतान, पात्लेखेत, रघुगङ्गा गाउँपालिकाको राखुभगवती, पिप्ले, मङ्गलाको कुहुँ, बराङ्जा, अर्मन, मालिकाको निस्कोट, रुम, ओखरबोट, देवीस्थान, दरबाङ, विम, धवलागिरिको गूर्जा, लुलाङ, मुदी, मुना, मराङ, मल्कबाङ र ताकम क्षेत्र मकै उत्पादनको हिसाबले पकेट क्षेत्रका रुपमा चिनिएका छन्।