नेपालको पहिलो अन्तर्राष्ट्रिय फ्रेन्चाइज गायन रियालिटी शो ‘नेपाल आइडल’को पाँचौं संस्करणमा म्याग्दीका सन्तोष पुन उत्कृष्ट १२ जनामा पर्न सफल भएका छन् । म्याग्दीको बेनी नगरपालिका–८,का सन्तोष पुनले उत्कृष्ट १२ मा छनौट भएपछि अब टप १० का लागि प्रतिस्पर्धा गरिरहेका छन् ।
नेपाल आइडलको सुरुवातदेखि नै उत्कृष्ट लयमा रहेका पुनले म्याग्दी जिल्लाको पूरानो गीतसँगै यूवापुस्ताले रुचाइरहका कोशेली पस्किरहेका छन् । उनका प्रस्तुतीले स्वदेश तथा विदेशमा रहेका म्याग्देलीको ध्यान तान्न सफल भएको छ । उनलाई उत्कृष्ट १० भित्र पार्न भोटिङ खुल्ला गरिएको छ । भोटिङका लागि मोवाइलको एसएमएसमा १३ लेखेर ३७००० मा पठाउन सकिन्छ ।
सन्तोषले हालसम्म अडिसन सहित ८ पटक दिएको प्रस्तुतीमा निर्णायकको भूमिकामा रहेका न्ह्यू बज्राचार्य, इन्दिरा जोसी र कालीप्रसाद बाँस्कोटाले प्रेरणादायिक जिम्मेबारी सहित गायन क्षेत्रमा प्रचुर सम्भावना भएको भन्दै प्रशंसा गर्ने गरेका छन् । उनले गोल्डेन माइक समेत पाएका छन् ।
क्यान्सर पीडित आमाको उपचार, बुबाले गरेको पसलको जिम्मेबारी तथा गायन क्षेत्रलाई समेत समय दिएको बताउँदै गायन क्षेत्रलाई थप उचाईमा पुर्याउने भन्दै निरन्तर मेहनत गरिरहेका छन् । उनले कोरोनाको लकडाउनको समयमा सांगीतिक क्षेत्रमा प्रवेश गरेका थिए । हातमा गितारसँगै परिवारको जिम्मेबारीलाई समेत निभाइरहेका पुनको प्रस्तुती दर्शकले समेत मन पराइरहेका छन् ।
