भलिबल खेलको विकास र युवा खेलाडी उत्पादन गर्ने लक्ष्यसहित बेनी नगरपालिकाका दुई वडामा आधारभूत भलिबल खेल प्रशिक्षण सञ्चालिन गरिएको छ । बेनपा-५ सेतढुङ्गास्थित सेतढुङ्गा यूवा क्लवको आयोजनामा १५ दिने आधारभूत तालिम सञ्चालन गरिएको हो ।
जिल्ला खेलकुद विकास समितिका सचिव एवम् जिल्ला भलिबल संघ म्याग्दीका सचिव कुमार किसानले प्रशिक्षण दिनुभएको थियो । त्यस्तै बेनपा-६, छापास्थित छापा यूवा क्लवद्धारा गाउँमा रहेका यूवाहरुलाई भलिबलमार्फत खेल पहिचान बनाउन १५ दिने भलिबल तालिम प्रदान गरिएको थियो।
नयाँ बर्ष बैशाख १ गते देखि आयोजना हुन लागेको छाप भलिबलको अवसरमा आयोजित तालिममा भलिबल खेलका आधारभूत ज्ञान, सीप, उपलब्ध गराई अनुशासित रुपमा खेलकूदको विकासमा लगाउने उद्देश्यका साथ आयोजित प्रशिक्षणमा दुबै वडामा ४० युवाको सहभागिता थियो।
प्रशिक्षणमा सहभागी खेलाडीलाई प्रशिक्षक किसानले शारीरिक व्यायाम, भलिबलका आधारभूत सिपहरु, फिङगर, डिक, डिफेन्स, ब्लक, सेटिङ्क, स्पाइकर, ग्रीप, जस्ता अभ्यास गराउनुभएको छापा यूवा क्लवको अध्यक्ष पुस्कल केसीले बताउनुभयो ।
गाउँघरमा आफ्नै तरिकाले भलिबल खेल्ने खेलाडीलाई प्रशिक्षक किसानले खेलको मापदण्ड, शैली मात्रै सिकाएनन, व्यवसायीक खेलाडीलाई आवश्यक पर्ने सीप समेत हस्तान्तरण गर्नुभएको थियो । वडास्तरमै खेलाडी उत्पादनमा पछिल्लो समय स्थानीय तहको लगानीले समेत सहज हुने प्रशिक्षक किसानको भनाई छ । म्याग्दीका यूवा क्लवले प्रतियोगितासँगै प्रशिक्षण कार्यक्रम समेत सञ्चालन गर्ने गरेका छन् ।
