२० वर्षअघि तीन दिनकी सुत्केरी हुँदा श्रीमान् बेपत्ता भएको पीडा भोगेकी म्याग्दीको मालिका गाउँपालिका–४ छापकी ४५ वर्षीया नरमाया घर्तीको जीवन फेरि अँध्यारिएको छ। गत भदौ १० गते भोटेकोसीमा आएको भीषण बाढीपछि छोरा २३ बर्षिया भविन्द्र रेग्मी रसुवाबाट सम्र्पकविहिन भएपछि आमा नरमायाँको आँखामा टिलपिल आँसु बगिरहेको छ । बाढीपछि छोरासँग सम्पर्क टुटेपछि आँखामा आँसु रोकिएको छैन।
भोटेकोशीमा विनाशकारी बाढी आएको सूचना पाएलगत्तै छोरालाई फोन गर्नुभएकी नरमायाँले सम्पर्क हुन नसकेपछि छोराको खोजीमा काठमाण्डौमा छिन् । रसुवाको आमाछोदिङ्मो गाउँपालिका–१, हाकुबेसीमा रहेको २ सय १६ मेगावाट क्षमताको आयोजना माथिल्लो त्रिशूली–१,जलविद्युत् आयोजनामा गएका साथीहरु घर फर्किएको सूचना पाएपछि छोराको प्रतिक्षा गरेपनि नफर्किएपछि रसुवामै गएर खोजी गर्ने भन्दै नरमायाँ पुगेपनि प्रगति भएको छैन।
गत भदौ ९ गते साँझ आमालाई फोन गरेका थिए। ‘असोजमा उपचारका लागि काठमाडौं जाने, दसैँअघि बिहे गर्ने र पोखरा गएर बस्ने योजना सुनाएका थिए’, नरमायाले भनिन्, ‘१० गतेदेखि छोरासँग सम्पर्क भएको छैन।’ नरमायालाई नयाँ नम्बरबाट फोन आउँदा कतै छोराले ग¥यो कि ? भन्ने आस लाग्छ। छोराको खोजीका लागि स्थानीय जनप्रतिनिधि, निर्माण कम्पनी, आयोजना र सरकारी निकायमा गुहार मागेकी नरमायालाई काठमाडौंदेखि घर फर्कने आँट आएको छैन।
‘छोराको अवस्था टुङ्गो नलागी कसरी घर जानु ?’, नरमायाले प्रश्न गरिन्, ‘तीन दिनको सुत्केरी हुँदा श्रीमान् बेपत्ता भए। भोटेकोशीको बाढीले मेरो भरोसा खोस्यो, झनै पीडा थपिदियो।’ खेतीकिसानी गरेर जीवन निर्वाह गर्दै आएकी नरमायाका श्रीमान् नन्दबहादुर रेग्मी बेपत्ता भएको २० वर्ष पुगेको छ।नन्दबहादुर दरवाङको एक किराना पसलमा बजार प्रतिनिधिको काम गर्थे। नन्दबहादुर बेपत्ता हुँदा नरमायाकी छोरी तीन दिनको थिइन्। अवस्था पहिचान नभएपछि आफन्त र गाउँलेहरूको सल्लाहमा नन्दबहादुरको धार्मिक विधिअनुसार काज किरिया भइसकेको छ।
नरमायाले आर्थिक अभावका कारण अदालतबाट श्रीमानको न्यायिक मृत्यु प्रमाणित गराउन नसकेको बताइन्। नन्दबहादुरले नागरिकता बनाएका थिएनन्। उनीहरूबिच कागजी रूपमा विवाह दर्ता पनि भएको थिएन। प्रक्रिया पूरा गर्न नसक्दा नरमाया सरकारले दिने सामाजिक सुरक्षा भत्ताबाट पनि वञ्चित छिन्।
कक्षा ८ सम्म पढेका भुपेन्द्रले बहिनीलाई ज्याला, मजदुरी गरेर कक्षा १० सम्म पढाए। गत जेठमा नाकमा समस्या देखिएपछि भुपेन्द्रले आमालाई दुई महिना गण्डकी अस्पतालमा उपचार गराएका थिए। भुपेन्द्रले पोखराबाटै आमालाई घर पठाएर मजदुरी गर्न रसुवा गएका थिए। नरमायाको नाकको समस्या अझै पहिचान भएको छैन। मासिक रु २१ हजारको औषधि सेवन गर्नुपर्छ। नरमायालाई थप उपचारका लागि असोजमा काठमाडौं लैजाने भुपेन्द्रको योजना थियो।
स्थानीय ओखरबोट माविका शिक्षक नवीन पुनले नरमायाको जीवनमा एकपछि अर्को बज्रपात परेको बताए। ‘नरमायालाई चिकित्सकले ब्रेन ट्युमरको आशंका गरेर थप उपचारका लागि काठमाडौं वा भारत जान भनेपछि पैसा जुटाउन रसुवा पुगेका भुपेन्द्रलाई बाढीले बेपत्ता बनायो’ उनले भने । नरमायासामु बेपत्ता छोरा खोज्ने मात्र नभएर आफ्नो उपचार कसरी गर्ने भन्ने चुनौती सृजना भएको उनले बताए ।
बागलुङमा विवाह भएकी नरमायाकी छोरीको बच्चा सानो भएकाले दाजुको खोजी र आफ्नो उपचारका लागि स्रोत जुटाउन हिँडेकी आमालाई सघाउन सकेकी छैनन्। शिक्षक पुनको अगुवाइमा नरमायाको उपचारका लागि सहयोग संकलन अभियान सञ्चालन भएको छ।‘एक हप्ताको अवधिमा सामाजिक सञ्जालमार्फत गरेको अपिलबाट नरमायाको खातामा करिब रु दुई लाख ५० हजार जम्मा भएको छ। प्रतिबद्धता जनाएका सबैले सहयोग गरेमा करिब रु आठ लाख जुट्ने अनुमान गरेको छु’, पुनले भने ।
‘रोग पहिचान र उपचार गरिदिन पाए हुन्थ्यो तर अस्पतालमा कुरुवा बसिदिने परिवारका सदस्य र आफन्तसमेत नभएर अप्ठ्यारो परेको छ’ पुनले भने । हाल स्वदेश तथा विदेशमा आर्थिक संकलन अभियान सञ्चालन भइरहेको मोना यूएईका अध्यक्ष काजिमान बुढाथोकीले बताए ।
