नेकपा एमाले बेनी नगरपालिका-९, घतानको वडा अधिवेशनबाट चिरञ्जीवि सुबेदीको अध्यक्षतामा २१ सदस्यीय वडा कमिटी गठन भएको छ । शनिबार घतानमा सम्पन्न भएको भेलाबाट उपाध्यक्ष अमरबहादुर बस्नेत, सचिब क्षेत्र बहादुर बरुवाल, उपसचिव सम्मरबहादुर मिजार रहनुभएको छ ।

वडा अधिवेशनको उद्घाटन गण्डकी प्रदेश कमिटी सदस्य हरिकृष्ण श्रेष्ठले गदैं नेकपा एमाले जनताको घरदैलोमा पुगेर जनताको सेवामा केन्द्रित हुने पार्टी भएकाले वडास्तरमा समेत रचनात्मक कार्यलाई प्राथमिकता दिन अनुरोध गर्नुभएको थियो ।

अधिवेशनमा बेनी नगर कमिटी निर्वतमान अध्यक्ष नारायण जिसी, नगर कमिटि अध्यक्ष बेलबहादुर कटुवाल, जिल्ला कार्यसमिति सदस्य बेलबहादुर चोखालले मन्तब्य राख्नुभएको थियो । बेनी नगरपालिकाका ९ वटा वडामा अधिवेशन सम्पन्न भएको छ भने बेनपा ३ भकिम्लीमा निकट भविस्यमै सम्पन्न गरिने नेकपा एमाले बेनी नगर कमिटिले जनाएको छ ।

गणतन्त्र दिवसको अवसरमा म्याग्दीमा जिल्लास्तरीय अन्तर मावि लोक गीत प्रतियोगिता एवम् विविध सांस्कृतिक कार्यक्रम हुने भएको छ । राष्ट्रिय लोक तथा दोहोरी गीत प्रतिष्ठान नेपाल म्याग्दीको आयोजनामा ‘हाम्रो अभियान, लोक संस्कृतिको संरक्षण, स्रष्टाको सम्मान, नबप्रतिभाको प्रोत्साहन’ भन्ने मूल नाराका साथ आगामी जेठ १५ गते प्रतियोगिताको आयोजना गरिएको प्रतिष्ठान म्याग्दीका अध्यक्ष धुब्र जिसीले जानकारी दिनुभयो ।

उहाँले लोक, मौलिक, कला संस्कृतिको संरक्षण र प्रवर्द्धनका लागि आयोजना गरिएको प्रतियोगितामा लोक गितमौलिक संस्कृति झल्किने खालको हुनुपर्ने बताउनुभयो । एक विद्यालयबाट १ जनाले सहभागिता जनाउन पाउने आयोजकले जनाएको छ । प्रतियोगिताका लागि म्याग्दीमा निजी तथा सामुदायिक विद्यालयलाई पत्रचार गरिने आयोजकले जनाएको छ । म्याग्दीमा राष्ट्रिय लोक तथा दोहोरी गीत प्रतिष्ठान नेपालले विभिन्न रचनात्मक कार्यमार्फत गीतसंगीत र समुदायमा आधारित गतिविधि गदै) आइरहेको छ ।

म्याग्दीमा नेपाली भाषा शिक्षक परिषद्को शाखा विस्तार गरिएको छ । ‘भाषा सभ्यताको संवाहक हो’ भन्ने मूल मन्त्रका साथ स्थापना भएको परिषद्को प्रथम भेलाबाट रमेशप्रसाद पौडेलको अध्यक्षतामा कार्यसमिति चयन गरेको छ।

शनिबार बेनी सामुदायिक माविमा आयोजित भेलाबाट उपाध्यक्ष गङ्गा बानियाँ, सचिव केशवराज पौडेल, कोषाध्यक्ष सुनिता महत, सहसचिव गम्भीर ढकाल रहनुभएको छ । त्यसैगरी सदस्यहरुमा केशवराज पौडेल,रामकृष्ण खड्का, सममायाँ विक, रमेशराज पौडेल रहेको सचिव पौडेलले जानकारी दिनुभयो । भेलाबाट गोविन्द रिजाल, रेखा कौशल रेग्मी, खगेश्वर रिजाल, रामप्रसाद सुबेदी, र हरि गिरीलाई सल्लाहकार सदस्यमा चयन गरिएको छ ।

भेलाबाट अध्यक्षयमा चयन हुनुभएका पौडेलले नेपाली भाषा शिक्षणसँग सम्बन्धित शिक्षक केन्द्रित र विद्यार्थी केन्द्रित कार्यक्रमका साथै भाषिक अनुसन्धानमूलक कार्यलाई प्राथमिकता दिने बताउनुभयो । ‘गर्वका साथ नेपाली विषय शिक्षक हुँ भन्ने वातावरण बनेको छ, भाषा र भाषिक अनुसन्धानका क्षेत्रलाई थप बल पुर्याउने गरी जिल्लाका सबै नेपाली शिक्षकलाई परिषद्मा जोड्छौ’ अध्यक्ष पौडेलले भन्नुभयो ।

म्याग्दीको बेनी नगरपालिका वडा नम्वर ६ जामुनाखर्क निवासी क्यान्सर रोगबाट ग्रसित चन्द्र कुमारी खत्रीलाई म्याग्दी समाज अमेरिकाबाट आर्थिक सहयोग प्राप्त भएको छ । बेनपा ६ वडा कार्यालयको लिखित अनुरोधमा बेनपा ६ चुत्रेनी स्थाई घर भई हाल अमेरिकामा रहनुभएको श्री सुदर्शन पौडेलको संयोजनमा संकलन भएको सहयोग रकम रु, १ लाख ५१ हजार ४ सय २७ रुपैयाँ बेनपा ६ का वडा अध्यक्ष कृष्णसिंह बानियाँ र वडा सदस्य ईस्वर पौडेलको रोहवरमा पीडित खत्रीलाई हस्तान्तरण गरिएको हो ।

खत्रीको उपचारका लागि अमेरिकामा रहेका म्याग्देलीहरुले स्वतस्फुर्त रुपमा सहयोग स्वरुप रकम प्रदान गरेका थिए । स्तन क्यान्सरबाट ग्रसित खत्रीको भरतपुर क्यान्सर अस्पतालमा हालै शल्यक्रिया गरिएको छ ।घरको आर्थिक अवस्था कमजोर भएकोले खत्रीको उपचारमा समस्या भएपछि बेनी नगरपालिका, वडा नम्वर ६ को कार्यालय, नेकपा एमाले बेनपा ६ वडा कमिटी र स्थानीय आमा समूह र घरपरिवार आफन्त ईश्ट्रमित्रहरुबाट समेत आर्थिक सहयोग संकलन गरिएको छ ।

हाल भरतपुर क्यान्सर अस्पतालमै डाक्टरहरुको निगरानीमा रहेर उपचार भईरहेको खत्रीलाई सहयोग उपलब्ध गराउने सम्पुर्णमा हार्दिक कृतज्ञता ज्ञापन गर्दै थप उपचारका लागि आर्थिक सहयोग जुटाउन मोना जापान, मोना कतार, कोरिया लगायत अन्य देशहरुमा रहेका मोना म्याग्दीका सहयोगी मनहरुसङ्ग पनि समन्वय भईरहेको र छिट्टैनै सहयोग रकम प्राप्त हुने आश्वासन प्राप्त भैरहेको वडा अध्यक्ष बानियाँले बताउनुभयो ।

म्याग्दीको सदरमुकाम बेनीमा विपन्नको शिक्षादीक्षा र उपचारका लागि एक परिवारले आफ्नो दिवङ्गत पितृको स्मृतिमा अक्षयकोष स्थापना गरेका छन्।बेनी नगरपालिका वडा नं ७ का स्वर्गीय गणेशलाल श्रेष्ठ,गणेशकुमारी श्रेष्ठ,डम्बरकुमारी श्रेष्ठ र भद्रकु्मारी श्रेष्ठको स्मृतिमा छोराहरूले ३ लाख ३ हजारको अक्षय कोष स्थापना गरिएको हो ।

भद्रकुमारी श्रेष्ठको वार्षिक तिथिको अवसरमा नेपाल भाषा मंकाखलमा आयोजित श्रद्दाञ्जली सभा तथा अक्षय कोष कार्यक्रमका जेहेन्दार विद्यार्थीको शिक्षादीक्षा तथा विपन्नको उपचारमा सहयोग गर्ने गरी कोषको घोषणा गरिएको हो ।

कार्यक्रमका प्रमुख अतिथि नेपाल भाषा मंकाखल म्याग्दीका अध्यक्ष कृष्णप्रसाद श्रेष्ठले स्वर्गीय मुखिया गणेशलालले ब्यक्तिगत स्वार्थभन्दा माथि उठेर समाजका लागि गरेको योगदानको चर्चा गर्नुभएको थियो ।

सोही अवसरमा संविधानसभा सदस्य गोविन्द पौडेल, नवराज शर्माले प्रगतिशिल स्वभावका मुखिया श्रेष्ठको परिवारबाट समाजमा ठूलो योगदान रहेको बताउनभुएको थियो ।

अक्षय कोष स्थापना कार्यक्रममा पत्रकार महासंघ म्याग्दीका उपाध्यक्ष हरिकृष्ण गौतम समाजमा रहेका विपन्न र अभिभावकविहिन बालबालिकाको शिक्षादीक्षमा सहयोगको आवश्यकता रहेको बताउनुभएको थियो । अक्षय कोष स्थापनार्थ आयोजित कार्यक्रमको अध्यक्षत दलप्रसाद श्रेष्ठ, स्वागत याम श्रेष्ठ र सञ्चालन राजेन्द्रकुमार श्रेष्ठले गर्नुभएको थियो ।

कार्यक्रममा म्याग्दीका विभिन्न क्षेत्रका प्रतिनिधित्व गर्ने ब्यक्तित्व, बेनीबजारबासीको सहभागिता रहेको थियो। अक्षयकोषबाट आउने ब्याजबाट सहयोग गरिने र कोष बृद्धि गदैं लाखौंको बनाउने योजना समेत रहेको बताइएको थियो ।