केही वर्षअघिसम्म विदेशी पर्यटकले खचाखच हुने म्याग्दीको प्रमुख पर्यटकीयस्थल पुनहिल क्षेत्रमा पछिल्ला वर्षमा आन्तरिक पर्यटकको आगमन बढ्दो छ । पर्यटक याममा दैनिक तीन सय ५० जनाको हाराहारीमा विदेशी पर्यटक आउने अन्नपूर्ण गाउँपालिका–६ मा अवस्थित पुनहिल, घोडेपानी क्षेत्रमा यो वर्षको पर्यटकयाममा एक सय ५० जनाको हाराहारीमा मात्रै विदेशी पर्यटक भित्रिए ।

पछिल्ला वर्षमा घोडेपानीका होटल व्यवसायीले पर्यटकलाई लक्षित गरेर सुविधासम्पन्न होटल खोल्ने लहर नै चलेको छ । पुराना होटल व्यवसायीले होटलको क्षमता र सुविधा बढाएका छन् । पहिले छाप्रोबाट होटल सुरु गरेका व्यवसायीले अहिले घोडेपानीमा पक्की घर नै बनाएर सुविधायुक्त होटल सञ्चालन गरिरहेका छन् ।

होटलको क्षमता र सुविधा विस्तारले पर्यटकलाई सुविधा पुगे पनि पुनहिल क्षेत्रको भ्रमणमा आउने विदेशी पर्यटकको सङ्ख्या घट्दै गएको घोडेपानीका होटल व्यवसायी क्याप्टेन डमबहादुर गर्वुजा पुनले बताए। “घोडेपानीमा एक दिनमा एक हजार दुई सय जनालाई सहजैरूपमा खाना र बसोबासको प्रबन्ध मिलाउन सक्ने क्षमता छ, व्यवसायीले पनि होटल क्षेत्रमै सुविधा बढाउन र स्तरीय बनाउन लगानी गरिरहेका छन्, तर विदेशी पर्यटक आउने सङ्ख्या हरेक वर्ष घट्दै गएको छ”, उनले भने ।

गत साउनदेखि मङ्सिर दोस्रो सातासम्म पुनहिल क्षेत्रमा १२ हजार तीन सय ६१ जना विदेशी पर्यटकले भ्रमण गरेका छन् । विगतका वर्षको तुलनामा यस वर्षको विदेशी पर्यटकको सङ्ख्या कम रहेको होटल व्यवसायी बताउँछन् । घोडेपानी पुनहिल क्षेत्रमा विदेशी पर्यटकको सङ्ख्या घट्नुको प्रमुख कारण कच्ची सडकले पदमार्गलाई विस्थापित गर्नुलाई मानिएको छ । जर्मनका १२ पर्यटकलाई पुनहिल क्षेत्रको भ्रमणमा ल्याउनुभएका मल्टि एडभेन्चर कम्पनीका डाइला शेर्पाले अन्नपूर्ण पदमार्ग क्षेत्रमा बढ्दो कच्ची सडक र धुलोको कारण विदेशी पर्यटकको आकर्षण घट्दै गएको बताए।

विगत २० वर्षदेखि अन्नपूर्णलगायतका मुलुकका विभिन्न क्षेत्रमा पर्यटक घुमाउने काममा सक्रिय शेर्पाले पदमार्गलाई मास्ने र विस्थापित गर्नेगरी खनिएका सडकका कारण पुराना स्थापित पर्यटकीय गन्तव्यमा विदेशी पर्यटकको रोजाइ घट्दो रहेको बताए । “विदेशी नेपालको रमणीय डाँडाकाँडा र पहाडमा पदयात्रा गर्न आउने हुन्, अब सडकले सबै पदमार्गलाई विस्थापित गर्दै खनिएका छन्, कच्ची सडकमै पर्यटकलाई धुलो धुँवा खुवाएर हिँडाउनुपर्छ, यो उनीहरूलाई मन पर्ने कुरा भएन, त्यसैले सडकले विस्थापित भएका ट्रेकिङ ट्रेललाई सडकले नछुने गरी पुनःनिर्माण गर्न जरुरी छ”, उनले भने । उनका अनुसार चक्रीय अन्नपूर्ण पदमार्ग क्षेत्रमा सडक विस्तारले पदमार्ग विस्थापित भएका छन् भने पर्यटकको यात्रा अवधिसमेत छोटिएको छ ।

पुनहिलबाट सूर्योदय र हिमशृङ्खलाको अवलोकन गरी फर्कँदै गरेकी अमेरिकी पर्यटक ग्योरीले प्राकृतिक सुन्दरताले भरिएको यो क्षेत्रलाई पदमार्ग मासेर खसेका सडकको धुँवा र धुलो समस्याका रूपमा देखिएको अनुभूति सुनाइन्। “हामी पहिलोपटक यहाँ आएका हौँ, पुनहिल साँच्चिकैको रमणीय रहेछ, यहाँबाट देखिने हिमशृङ्खला र सूर्योदयले मनै लोभ्याएको छ, तर यहाँ आइपुग्दा पदयात्रामा सडकको धुलो र धुँवाले हामीलाई नमज्जा लाग्यो”, उनले भनिन् ।

सडकको पहुँचले आन्तरिक पर्यटकको आगमन भने बढ्दो छ । अन्नपूर्ण गाउँपालिकाको केन्द्र पोखरेबगरबाट घार–शिख–चित्रे हुँदै घोडेपानीसम्म सडक पुगे पनि देशका विभिन्न स्थानका विद्यालय, कार्यालय, सङ्घसंस्था, समूहबाट पुनहिल क्षेत्रको भ्रमणमा पुग्ने बढेका छन् । आन्तरिक पर्यटक बढे पनि समग्रमा पर्यटन क्षेत्रको प्रभाव विदेशी पर्यटकमै निर्भर हुने भएकाले विदशी पर्यटकको आगमन घट्दै जाँदा पर्यटन व्यवसायी चिन्तित छन् । पुनहिल घोडेपानी पुग्ने पुरानो पदमार्गमध्येमा पर्ने पोखरेबगर–घार–शिख–चित्रे–घोडेपानी पदमार्ग पूर्णरूपमा सडकले विस्थापित गरेको छ ।

यो पदमार्गमा आउने पर्यटकलाई लक्षित गरी दूरविनडाँडा, घार, शिखलगायतका क्षेत्रमा खोलिएका होटल पूर्णरूपमा बन्द भइसकेका छन् । घोडेपानी पुनहिल पुग्ने मुख्य पदमार्गमध्ये कास्कीबाट उल्लेरी हुँदै आउने पदमार्गसमेत अधिकांश सडकले मासिएको भन्दै पथप्रदर्शक चिन्तित छन् । सडक विस्तार गर्दा पदमार्गलाई जोगाउने गरी सडकको नक्सा¬ङ्कन र विस्तार गर्न उनीहरूले माग गरेका छन् । घोडेपानीमा कास्कीको घान्द्रुक भएर आउने पदमार्गका साथै अन्नपूर्ण धवलागिरि सामुदायिक पदमार्ग हुँदै मोहरेडाँडा र फूलबारी हुँदैसमेत पर्यटक पुग्ने गर्छन् । -रासस

बेनी नगरपालिका-४,सिंगास्थित माथिल्लो तातोपानी बजारको सडक कालोपत्रे गरिएको छ । बेनी–दरवाङ सडक अन्तरगत पर्ने तातोापनी बजारको ३ सय मिटर सडक कालोपत्रेको काम अन्तिम चरणमा पुगेको छ ।

बेनी नगरपालिकाको ३० लाख बजेटमा प्रिमिक्स प्रविधिबाट कालोपत्रे गरिएको वडा अध्यक्ष अणबहादुर खड्का (भगवान) ले बताउनुभयो । ‘तल्लो र उपल्लो तातोपानी बजार कालोपत्रेसँगै स्थानीय र पर्यटकलाई सहज भएको छ,‘स्थानीय समुदायको सहयोगले पनि काम गर्न सहज भयो’ अध्यक्ष खड्काले भन्नुभयो ।

उहाँका अनु्सार बजार क्षेत्रमा सडकसँगै तटबन्धन सहितका समस्या समाधानका लागि समेत नगरपालिकामार्फत प्रदेश र संघीय सरकारसँग बजेट समेत माग गरिएको छ । तल्लो र माथिल्लो तातोपानी बजारको सडक कालोपत्रे सडकले पश्चिम म्याग्दी जाने र तातोपानीबासी र कुण्डमा आउने पाहुनालाई हिलो र धुलोको समस्याबाट मुक्त बनाएको स्थानीय होटल ब्यवसायी कुमार केसीले बताउनुभयो ।

श्रमजिवि निर्माण कम्पनीले ठेक्का लिएर काम सुरू गरेको कालोपत्रे सडकको नियमित अनुगमन तथा प्राविधिक सहितको निगरानी समेत भइरहेको छ । निर्माण ब्यवसायी प्रकाश बानियाँले स्थानीयबासी, जनप्रतिनिधि सहित सरोकारवाला निकायको समन्वयमा मापदण्ड अनुसार नै काम भइरहेको बताउनुभयो ।

गतबर्ष बेनी नगरपालिकाले तल्लो तातोपानीमा ३३९ मिटर सडक प्रिमिक्स प्रविधिबाट कालोपत्रे, २० मिटर लामो मेसिनरी पर्खाल, सवारी आवतजावतलाई असहज बनाएको ठुलो ढुङ्गा फुटाउने र १०३ मिटर सडक ढलान करिब ३६ लाखभन्दा बढीमा सकिएको थियो ।

प्राकृतिक उपचार गर्न आउने विरामी लगायतको संख्यामा बृद्धि हुन थालेपछि कुण्ड स्नान गर्ने पूर्वाधारलाई ब्यवस्थित, स्थानीय होटल ब्यवसायीले होटलको सुविधा विस्तार र स्थानीय सरकारले सडक लगायतको पूर्वाधार निर्माणमा जोड दिएको छ । बेनी देखि तातोपानी बजार हुदैँ मंगला गाउँपालिकाको सिमसम्मको १२ किलोमिटर सडक कालोपत्रे भएपछि यात्रुलाई निकै सहज भएको छ ।

म्याग्दीको बेनीमा जारी २१ औं जिल्लास्तरीय अन्तर माध्यमिक विद्यालय स्तरीय जेसीज कप फुटवल’ प्रतियोगिताको प्रि–क्वारट फाइनलको खेल शुरु भएको छ । २३ वटा विद्यालयले सहभागिता जनाएको जेसीज कप फुटबलमा बिहीबारबाट दोश्रो चरणको खेल शुरु भएको छ । दोश्रो चरणको खेल अन्तरगत हेम माध्यमिक विद्यालय सिवाङले किसानी चन्द्रकुन्ता माविलाई पराजित गर्दै क्वाटर फाइनलमा स्थान बनाएको छ ।

निर्धारीत समयको खेल एकएक गोलको बराबरिमा सकिएपछि भएको ट्राइब्रेकरमा हेम माध्यमिक विद्यालयले १५–१४ गोल अन्तरले पराजित गर्दै क्वाटर फाइनलमा स्थान बनाएको हो । त्यस्तै जामुनाखर्क माविलाई पराजित गर्दै डिफेण्डीङ च्याम्पियन सारदा माविले पनि क्वाटर फाइनलमा स्थान बनाएको छ ।

निर्धारीत समय गोलरहित बराबरिमा सकिएपछि भएको ट्राइब्रेकरमा ५–४ गोलअन्तरले जामुनाखर्कलाई पराजित गर्दै सारदाले अघिल्लो चरण प्रवेश गरेको हो । त्यस्तै अर्को खेलमा म्याग्दी एकेडेमी सिंगाले गौ बमबस्त माविलाई १–० गोल अन्तरले पराजित गर्दै अर्को चरणमा प्रवेश गरेको छ ।

पहिलो चरणको पहिलो खेलमा डिफेन्डिङ च्याम्पियन सारदा माविले बुद्ध एकेडेमीलाई शुन्यका विरुद्ध एक गोलले पराजित गर्दै दोस्रो चरणमा प्रवेश गरेको थियो ।

त्यस्तै प्रकाश मावि बेनीलाई दुईका विरुद्ध तीन गोलले पराजित गर्दै गौबमवस्त मावि देविस्थान दोस्रो चरणमा प्रवेश गरेको छ । खेलमा मंगला माविलाई शुन्यका विरुद्ध पाँच गोलले पराजित गर्दै न्यू वेष्ट प्वाईन्ट दोस्रो चरणमा प्रवेश गरेका छ । माउण्ट एभरेष्ट र केबी एकेडेमी दरवाङविचको खेलमा एक÷एक गोलको बराबरीमा सकिएपछि ट्राइब्रेकरमा (८–७) गोल अन्तरले माउण्ट एभरेष्ट दोस्रो चरणमा प्रवेश गरेको हो ।

किसानी मावि विमलाई शुन्यका विरुद्ध पाँच गोलले पराजित गर्दै बेनी सामुदायिक विद्यालय बेनी पनि दोस्रो चरणमा प्रवेश गरेको छ । त्यसैगरी लिटिल गार्डेन एकाडमीलाई पराजित गर्दै सरस्वती माध्यमिक विद्यालय तातोपानी एवम् बालमन्दीर माध्यमिक विद्यालयलाई पराजित गर्दै जनप्रिय माध्यमिक विद्यालय दरवाङले दोश्रो चरणमा स्थान बनाएका छन् ।

जारी जेसीजकप म्याग्दी जेसीजको आयोजना र राम–विमला फाउण्डेशनको मुख्य प्रायोजनमा सञ्चालन भै रहेको छ ।
प्रतियोगितामा बिजेता विद्यालयलाई रनिङ शिल्ड, ट्रफि, मेडल र प्रमाणपत्र सहित नगद ५२ हजार दुई सय २२ र उप–बिजेतालाई ट्रफि, मेडल र प्रमाणपत्रको साथमा नगद ३२ हजार दुई सय ३२ रुपियाँ पुरस्कार प्रदान गरिने जेसीज कप फुटबलका मुल संयोजक विनोद घर्तीले जानकारी दिनुभयो ।

प्रतियोगितामा उत्कृष्ट खेलाडी, गोलरक्षक, डिफेन्डर, स्ट्राइकर, मिडफिल्डर, प्रशिक्षक, सर्वाधिक गोलकर्ता तथा राईजिङ प्लेयरलाई र अनुशासित टिमलाई विभिन्न अवार्डसहित दुई हजार पाँच सय रुपियाँ नगद प्रदान गरिने छ । अनुशासित टिमलाई नगद सहित ट्रफि, मेडल र प्रमाणपत्र प्रदान गरिने म्याग्दी जेसीजका महासचिव कुमार बानियाँले बताउनुभयो ।

माध्यमिक विद्यालयमा चालु शैक्षिक सत्रमा कक्षा १० सम्म अध्ययन गर्ने विद्यार्थीहरुले सहभागीता जनाउने जेसीज कप फुटबल प्रतियोगिताले विद्यालयस्तरमा लुकेर रहेको खेल प्रतिभालाई उजागर गराउन महत्वपूर्ण भूमिका खेल्दै आएको म्याग्दी जेसीजका अध्यक्ष सुमन बानियाँले बताउनुभयो ।