Site icon BeniOnline.com.np जिल्लाका ताजा अनलाइन समाचार

जिम्बु टिप्ने क्रममा शंकास्पद वस्तु पड्किएर म्याग्दीका चार यूवा घाईते

मुस्ताङको वारागुङ मुक्तिक्षेत्र गाउँपालिका–३ तेताङ माथिको प्याङ भन्ने उच्चलेंकको ओढारमा शंकास्पद वस्तु पड्किएर म्याग्दीका चार यूवा घाईते भएका छन् ।

मंगलबार बेलुका करिब ५ बजेतिर जिम्बु खोज्न जाने क्रममा शंकास्पद वस्तु खोल्ने क्रममा अचानक पड्किएर म्याग्दीको मालिका गाउँपालिका –३ का २२ वर्षीय रेश रोक्कामगर, १९ वर्षीय टिका बुढामगर,२५ वर्षीय तेजेन्द्र रोकामगर र २५ वर्षीय दिलिप रोकामगर घाइते भएको जिल्ला प्रशासन कार्यालय मुस्ताङले जनाएको छ । ‘घाईतेको थप उपचारका लागि पोखरा रिफर गरिएको छ,‘घटनाको अनुसन्धान भइरहेको छ’ मुस्ताङका प्रजिअ नेत्रप्रसाद शर्माले भन्नुभयो । जिम्बु टिप्न गएका युवाहरु अचानक घाइते भएर जोमसोम अस्पतालमा ल्याइएको थियो ।

घाइतेहरुको थप उपचार गर्न म्याग्दीको अन्नपूर्ण गाउँपालिका र मुस्ताङको वारागुङ मुक्तिक्षेत्र गाउँपालिकाले गाडीको समन्वय गरेको थियो । घाइतेहरुको बाटो खर्चका लागि वारागुङ मुक्तिक्षेत्रले नगद २० हजार रुपैयाँ आर्थिक सहयोग समेत गरेको छ । घटनाका बारेमा वारागुङ मुक्तिक्षेत्र गाउँपालिका अध्यक्ष रिङजिन नाम्गेल गुरुङ र सुरक्षाकर्मीको टोली अस्पताल पुगेको थियो । घाइते भएकामध्ये सुरेश मगरको दुबैतर्फको हातको औलामा क्षति पुगेको छ। उनको बायाँतर्फको हातको ३ वटा औंला समेत नरहेको अस्पतालले जनाएको छ । रेश रोकाागमरको दुबै खुट्टाको घुँडाको तलको भाग जलेको छ ।

यस्तै,टिका बुढामगरको गर्दन र बायाँ खुट्टा जलेको छ भने दिलिप रोक्कामगरको अनुहारदेखि तलसम्मको भाग जलेको अस्पतालका डाक्टर कुन्दन कर्णले जानकारी दिए । यता,जिल्ला प्रहरी कार्यालय मुस्ताङले बुधबार बिहानै ईलाका प्रहरी कार्यालय छुसाङमा कार्यरत प्रहरी ईञ्चार्ज प्रहरी नायव निरीक्षक पदम् राना नेतृत्वको टोली थप अनुसन्धानका लागि घटनास्थलतर्फ प्रस्थान गरेको जनाएको छ । अचानक पड्किएको पर्दाथ विष्फोटक समेत हुन सक्ने र थप भेटिने सम्भावना रहेकाले प्रहरीको अनुसन्धान टोली गएको जनाइएको छ । मुस्ताङका पत्रकार सुन्दर थकालीको सहयोगमा

Exit mobile version