‘कति मीठो हो र का बोली वचन’ मनै लोभ्याउने

लोकनाथ भुसाल “घायलश्री”

भरखरै बजारमा आएको ‘बोली वचन’ गायक रवि कार्की र गायिका मेलिना राईको स्वरमा सजिएको प्रेमभावमा आधारित गीत हो। प्रवीण खत्री ठुलेको शब्द रहेको यस गीतमा सुजाने सिंह खड्का र रवि कार्कीको अभिनय देख्न सकिन्छ भने यसको निर्देशन एकेन्द्र शारशंकरले गरेका छन्। यस गीतले प्रेममा मीठो बोली, आत्मीय व्यवहार, आपसी आकर्षण र जीवनसाथी बन्ने चाहनालाई सुन्दर ढङ्गले प्रस्तुत गरेको छ।

यस गीतको मुख्य भाव प्रेम, आकर्षण र भावनात्मक आत्मीयता हो। प्रेममा बाहिरी रूपभन्दा व्यक्तिको बोली, व्यवहार र संस्कारले मन जित्ने कुरा गीतमा व्यक्त गरिएको छ। प्रिय व्यक्तिको बोलीले मनमा प्रेमको तरङ्ग उत्पन्न गर्छ र उसको उपस्थितिले जीवनलाई सुन्दर बनाउँछ। प्रेमको सुरुवाती आकर्षणदेखि जीवनभर साथ रहने चाहनासम्मका भाव यस गीतमा समेटिएका छन्। गीतकारले प्रेममा परेको व्यक्तिको मनोभावलाई सरल र रोचक शैलीमा प्रस्तुत गरेका छन्। ‘कति मिठो हो र का बोली वचन’ भन्ने पङ्क्तिले प्रिय व्यक्तिको बोलीप्रतिको मोह दर्शाउँछ।

त्यस्तै, ‘तिम्रो मिठो बोलनि कला छ, मेरो मनमा भुकम्प चला छ’ भन्ने अभिव्यक्तिले प्रेमले मनमा ल्याउने तीव्र हलचललाई देखाउँछ। प्रेमिकालाई परीसँग तुलना गर्नु, उसको लज्जा र संस्कारको प्रशंसा गर्नु तथा जीवनको सार बन्ने इच्छा व्यक्त गर्नुले गीतकारको प्रेमभाव स्पष्ट पार्छ। गीतमा एक युवक र युवतीबीच पहिलो भेट वा प्रेमको सुरुवाती अवस्थाको चित्रण गरिएको छ।

युवक युवतीको रूप, बोली र व्यवहारबाट प्रभावित हुन्छ। आँखाको भाषा, लजाउने स्वभाव र नजरको आकर्षणले उनीहरूबीच प्रेमको सम्बन्ध विकसित हुँदै गएको सङ्केत गर्छ। अन्ततः युवकले प्रेमलाई वैवाहिक जीवनसम्म पुर्‍याउने र दुईबाट चार हुने अर्थात् परिवार विस्तार गर्ने चाहना व्यक्त गर्छ। गीतमा ‘चन्द्रग्रहण लागेको रात’, ‘फूल’, ‘परी’, ‘स्वर्ग’ र ‘लज्जावती झार’ जस्ता प्रतीक तथा बिम्ब प्रयोग भएका छन्। फूल र परीले सुन्दरता, स्वर्गले सुखमय जीवन तथा लज्जावती झारले लज्जाशील स्वभावलाई सङ्केत गर्छन्।

प्रिय व्यक्तिको सुन्दरताको फूलसँग र स्वर्गसँग तुलना गर्दा उपमा अलङ्कारको प्रयोग भएको छ। ‘मनमा भूकम्प चल्नु’ ले प्रेमका कारण उत्पन्न भावनात्मक हलचललाई अतिशयोक्तिपूर्ण रूपमा प्रस्तुत गर्छ। सरल, बोलचालका र स्थानीय स्वाद भएका शब्दले गीतलाई स्वाभाविक तथा आत्मीय बनाएका छन्। गीतमा प्रेमिल भावअनुकूल मधुर लय र गेय शैली रहेको छ।

रवि कार्की र मेलिना राईको सुरिलो गायनले शब्दको भावलाई प्रभावकारी बनाएको छ। दोहोरिने शब्द, छोटा वाक्य र आकर्षक अभिव्यक्तिले गीतलाई सजिलै गुनगुनाउन सकिने बनाएका छन्। गीतको दृश्य संयोजन र कलाकारको अभिनयले यसको भावनात्मक पक्षलाई थप जीवन्त बनाएको छ। यस गीतले साँचो प्रेममा मीठो बोली, असल व्यवहार, सम्मान र आत्मीयताको ठूलो महत्त्व हुन्छ भन्ने सन्देश दिन्छ।

बाहिरी सुन्दरताले आकर्षित गर्न सक्छ, तर मधुर वचन र संस्कारले सम्बन्धलाई गहिरो बनाउँछन्। प्रेम केवल क्षणिक आकर्षण नभई आपसी विश्वास, समर्पण र सहयात्राको भावना पनि हो। त्यसैले प्रिय व्यक्तिको मन जित्न बोलीमा मिठास र व्यवहारमा इमानदारी हुन आवश्यक छ।

………… कति मीठो हो र का बोलीवचन, अनुमति दिन्छौ र दिलमा बस्न। मैले हेरेँ मायाको आशाले, तिमी बोल्यौ आँखाको भाषाले। चन्द्रग्रहण लागेको रातमा, तिम्रै मुहार टल्कियो पातमा। तिमीलाई केसँग गरूँ म तुलना, फूलले पनि बिर्सियो फुल्न। तिमी बत्तीस लक्षणकी परी हो, तिमी भए घर स्वर्गैसरि हो। बुझेकी छौ रहनसहन, सम्हालेकी छौ लाजको गहना।

चुलबुल चुलबुल भएको मन यो, त्यही बोलीले एकसुरे बनायो। दियौ तिम्ले नजरको सजाय, लज्जावती झार जस्तै लजाएँ। पढ्छौ र कुन स्कुल कलेज रैछ धेरै दिल चोर्ने नलेज। हेर्यौ तिम्ले शिरदेखि पाउसम्म पाइनँ मैले मन राख्ने ठाउँसम्म। तिम्रो मिठो बोलनी कला छ, मेरो मनमा भूकम्प चला छ। इच्छा थियो जीवनको सार हुने, एकबाट दुई, दुईबाट चार हुने। ………

गीत सुन्न तालको लिङ्क खोल्नुहोस्। https://youtu.be/TRgFUV-NGXg?is=K-jk9giJ85tN7spI

Boli Bachana – Rabi Karki | Melina Rai | Suzanne Singh Khadka | New Nepali Song 2026 – 2083

Presenting new Nepali song Boli Bachana by Rabi Karki & Melina Rai …