सार्वजनिक स्थानमा बोल्न नसक्दा ग्रामिण क्षेत्रमा अवसरबाट बन्चित हुनुपरेको म्याग्दीको मंगला गाउँपालिका–१,कुहुँमा आयोजित तीनदिने उद्घोषण, भाषणकला तथा नेतृत्व विकास तालिम सकिएको छ । महिलालाई बोल्ने बानीको विकास गर्न मालिका सामुदायिक सिकाई केन्द्रको आयोजना तथा मंगला गाउँपालिकाको सहयोगमा बिहिबारदेखि आयोजित तालिम शनिबार सम्पन्न भएको हो ।

तालिम समापन कार्यक्रमका प्रमुख अतिथि मंगला गाउँपालिकाका प्रबक्ता एवम् वडा अध्यक्ष एकजित रोकाले समुदायमा पद अनुसारको जिम्मेबारी र विभिन्न सार्वजनिक कार्यक्रमहरुमा समेत भाषण गर्ने शैली राम्रो हुनेलाई अवसरको कुनै कमी नभएको बताउनुभएको थियो ।

व्यक्तित्व विकास सबैभन्दा ठूलो सम्पत्ति भएकाले निर्धक्कसँग आफ्नो कुरा राख्न सक्ने हुनु ठूलो उपलब्धी हुने वडा अध्यक्ष रोकाको भनाई थियो ।तालिममा सहभागीको तर्फबाट राकुमारी रोका र रिमा बानियाँले बोल्ने बानिको विकास नहुदाँ संघसंस्थामा नेतृत्व गर्ने अवसरबाट समेत बन्चित हुनुपर्ने अवस्थामा तालिमले आत्मबल बढेको बताउनुभएको थियो ।

मंगला–१ कुहुँ, पूर्णगाउँ, थाईवाङ, पौयूपाँटा लगायतका बस्तीबाट ३० जना महिला तथा विद्यार्थीको सहभागिता रहेको तालिममा सिकाई केन्द्रकी अध्यक्ष गौमती रोकाले महिलालाई भाषण गर्ने शैली र नेतृत्व विकास अति आवश्यक रहेको बताउनुभयो ।

एकै ब्यक्तिले लामो समयसम्म नेतृत्व गर्ने अवस्थाको अन्त्यका लागि महिलाहरु समेत निरन्तर सक्रिय हुनुपर्नेमा जोड दिनुभयो । तालिममा उद्घोषण, भाषणकला,नेतृत्व विकास अन्तरगत सैद्धान्तिक तथा व्यावहारिक ज्ञान र सिप, र भाषण कला, माइन्यूट लेखनका साथै सफल नेतृत्व कसरी हुने लगायत प्रयोगात्मक अभ्यास समेत गरिएको थियो ।

तालिमको उद्घाटन सत्रमा अध्यक्षता रोका, सञ्चालन सहजकर्ता रमिला पाइजाले गर्नुभएको थियो। तालिमकोनेपाल पत्रकार महासंघका उपाध्यक्ष हरिकृष्ण गौतम, कोषाध्यक्ष अमित विश्वकर्माले सहजीकरण गर्नुभएको थियो ।

नेपाल रेडक्रस सोसाइटी म्याग्दीको ३१ औं साधारण सभा तथा अधिवेशन पश्चिम म्याग्दीको दरबाङमा शनिवार सम्पन्न भएको छ । कार्यक्रमको उद्घाटन गर्दै प्रमुख अतिथी नेपाल रेडक्र सोसाइटीका केन्द्रीय महामन्त्री भूपतिलाल श्रेष्ठले विश्वभर मानव समुदायमा आइपर्ने मानवीय तथा प्राकृतिक जुनसुकै खालका विपद्मा रेडक्रस अभियानले अनवरत सेवा प्रदान गर्दै आएको बताउनुभयो ।

यस वर्ष पनि मानवतालाई जीवित राखौं भन्ने नारासहित मे ८ तारिखमा विश्व रेडक्रस दिवस मनाइएको बताउँदै प्रमुख अतिथी श्रेष्ठले संसारमा द्धन्द्ध,युद्ध र विपदले मानवता संकटमा परेको र यस अनिश्चित संसारमा रेडक्रस स्वयम्सेवकले प्रदान गर्ने निःस्वार्थ सेवा मार्फत मानवताको दियो जोगाइ राख्न आवश्यक रहेको विचार व्यक्त गर्नुभयो ।

त्यसैगरी नेपाल रेडक्रस सोसाइटी म्याग्दीका सभापति अमर वानियाँले मानवीय सेवामा समर्पित नेपाल रेडक्रस सोसाइटीको म्याग्दी शाखाले संगठन विस्तार,विपद् व्यवस्थापन,रक्तसञ्चार सेवा,एम्बुलेन्स सेवा,जुनियर तथा युवा रेडक्रस परिचालन,आर्थिक स्रोत परिचालन,सामुदायिक जीविकोपार्जन प्रवद्र्धन कार्यक्रम लगाएतका परोपकारी तथा समुदायका आर्थिक विकाससँग समेत जोडिएका विभिन्न कार्यहरु गर्दै आएको बताउनुभयो ।

म्याग्दी रेडक्रसको यात्रा अनेक किसिमका सेवाहरुको इतिहासले भरिएको बताउँदै सभापति बानियाँले पीडित र असहायहरुको सेवा नै रेडक्रसको मुख्य उद्धेश्य हो भन्नुभयो ।

सोही अवसरमा म्याग्दी रेडक्रसको दरबाङ उपशाखाको भवन निर्माणका लागि निःशुल्क जग्गा उपलव्ध गराउनुहुने स्थानीय समाजसेवी शिवनारायण फगामीलाई विशेष सम्मान समेत गरिएको थियो ।

त्यस्तै उत्कृष्ट उपशाखा शिख उपशाखा,उत्कृष्ट सभापति टेकबहादुर रावल, रत्नेचौर, उत्कृष्ट सचिव सेते तिलिजा, शिख उपशाखा,विषेश पुरस्कार सिंगा उपशाखा, सहसचिव रमेश पौडेल,सदस्यता, महिला सदस्यता बृद्धि सिंगा उपशाखा, मानवीय सेवाको उत्कृष्ट उपशाखा पिप्ले, उत्कृष्ट साझेदारी परियोजना, आँखा उपचार केन्द्र दरबाङ उपशाखालाई सम्मान गरिएको थियो ।

जिल्ला सभापति अमर बानियाँको अध्यक्षतामा सम्पन्न भएको साधारणसभाको स्वागत उपसभापति काशिराम रेग्मी, दरबाङ उपशाखा सभापति भिमप्रसाद गौतम, महामन्त्री यामबहादुर चोखालले वार्षिक प्रगति तथा सञ्चालन, कोषाध्यक्ष नवराज पौडेलले आर्थिक प्रतिवेदन तथा आयव्यय विवरण प्रस्तुत गर्नुभएको थियो।

म्याग्दीको सदरमुकाम बेनीमा सञ्चालित न्यू वेष्ट प्वाइन्ट आवासीय माध्यमिक विद्यालयमा आज शुक्रवार विभिन्न कार्यक्रमहरु सम्पन्न भएका छन् । विद्यालयद्वारा आयोजित एक समारोहबीच हालै प्रकाशित स्मारिका ‘प्रभात’को विमोचन, वार्षिक परीक्षामा उत्कृष्ट नतिजा ल्याउने विद्यार्थीहरुलाई पुरस्कार वितरण र नवआगन्तुक विद्यार्थीहरुलाई स्वागत गरिएको हो ।

कार्यक्रमको उद्घाटन तथा विद्यालयद्वारा प्रकाशित प्रभात अङ्क–७ स्मारिका–२०८१ को विमोचन गर्दै जिल्ला समन्वय समिति म्याग्दीका प्रमुख राजकुमार थापाले न्यू वेष्ट प्वाइन्टले प्रकाशन गरेको प्रभात म्याग्दीको शैक्षिक पूँजीको रुपमा रहने बताउनुभयो । उहाँले विमोचन भएको प्रभात पुस्तकले अध्ययन तथा अनुसन्धानमा समेत महत्वपूर्ण सहयोग पु¥याउने बताउँदै वेष्ट प्वाइन्टले शैक्षिक गतिविधि सँगसँगै अतिरिक्त क्रियाकलापहरुमा जोड दिएको बताउनुभयो ।

जिल्ला समन्वय समिति प्रमुख थापाले विद्यालयका संस्थापकहरुको दुरदृष्टि र नवीनतम् सोच तथा कर्तव्यनिष्ठ शिक्षक, कर्मचारीहरुको कारणले विद्यालय अहिलेको अवस्थासम्म आइपुगेको बताउँदै विद्यालयले शैक्षिक क्षेत्रमा हासिल गरेको उपलब्धिलाई बचाएर आगामी दिनमा पनि निरन्तरता दिनुपर्नेमा जोड दिनुभयो ।

सोही कार्यक्रममा बोल्दै बेनी नगरपालिकाको शिक्षा शाखा प्रमुख हेमचन्द्र पौडेलले विद्यालयले शैक्षिक क्षेत्रमा हासिल गरेको प्रगतिलाई आगामी दिनमा पनि टिकाइराख्न सुझाव दिनुभयो । उहाँले बेनी नगरपालिकाले संस्थागत विद्यालयहरुका लागि गरेको निर्णयको कार्यान्वयन गरेर सघाउन आग्रह गर्दै विद्यालयहरुको कार्यसम्पादनलाई सहजीकरण गर्न स्थानीय तहलगायत तालुकदार निकायबाट आवश्यक सहयोग हुने बताउनुभयो ।

कार्यक्रममा गएको शैक्षिक सत्र–२०८० सालको वार्षिक परीक्षामा उत्कृष्ट अङ्कसहित नर्सरीदेखि कक्षा ९ सम्म प्रथम, द्वितीय र तृतीय हुने विद्यार्थीहरुलाई उनीहरुका अभिभावकसहित पुरस्कार वितरण तथा सम्मान गरिएको थियो । कार्यक्रममा म्याग्दी साहित्यिक समाजका अध्यक्ष ध्रुवलाल शर्माले मन्तव्य व्यक्त गर्नुभएको थियो ।

विमोचित भएको स्मारिका प्रभातभित्र विद्यालयको समग्र गतिविधिसहित प्राध्यापक, साहित्यकार तथा विभिन्न लेखक र विद्यार्थीहरुको सिर्जना, लेखरचना र साहित्यलाई समावेश गरिएको छ ।

वेष्ट प्वाइन्ट एजुकेशन फाउण्डेशन म्याग्दी प्रािलका अध्यक्ष यजनलाल शाक्यको अध्यक्षता, प्रिन्सिपल डिबी दाहालको स्वागत र भाइस प्रिन्सिपल तथा वेष्ट प्वाइन्ट मिडिया हवका संयोजक कृष्णबहादुर जिसीको सञ्चालनमा कार्यक्रम सम्पन्न भएको थियो । उक्त कार्यक्रममा विद्यालयका संस्थापक निर्देशकहरु, अभिभावक एवं सल्लाहकारहरु, शिक्षक, विद्यार्थी लगायतको उपस्थिति रहेको थियो भने कलाकार विद्यार्थीहरुले नृत्य प्रस्तुत गरेका थिए ।

पश्चिम म्याग्दीको मंगला गाउँपालिकाको केन्द्र बाबियाचौरमा उद्घोषण तथा भाषणकला सम्बन्धी तालिम सम्पन्न भएको छ । मंगला सामुदायिक सिकाइ केन्द्र मंगला–२, बाबियाचौरको आयोजना र मंगला गाउँपालिकाको संयोजनमा तालिम सञ्चालन गरिएको थियो ।

गएको आइतबारदेखि मङ्गलवारसम्म तीन दिन चलेको तालिममा मंगला–२, बाबियाचौरको सिमलचौर, कोत्राबाङ, तोराखेत, रनबाङलगायत स्थानका महिला समूहबाट करिब २० जना महिलाहरुले सहभागिता जनाएका थिए । ग्रामीण भेगका महिलाहरुलाई उद्घोषण र भाषणकलामा सक्रिय बनाउने उद्देश्यले क्षमता अभिवृद्धि तालिम आयोजना गरिएको मंगला सामुदायिक सिकाइ केन्द्रले जानकारी दिएको छ ।

तालिमको नेपाल पत्रकार महासंघ जिल्ला शाखा म्याग्दीका कार्यसमिति सदस्य एवं जलजला अनलाइन डटकमका सम्पादक तथा सञ्चालक कृष्णबहादुर जिसी र नेपाल टेलिभिजन म्याग्दीका जिल्ला संवाददाता एवं रुप्से दैनिक पत्रिकाका सहसम्पादक समेत रहेका पत्रकार प्रताप बानियाँले सहजीकरण गर्नुभएको थियो । तालिममा उद्घोषण तथा भाषणकला, कार्यक्रम सञ्चालन गर्ने तौरतरिका, कार्यक्रममा सम्बोधन, स्वागत र शुभकामना मन्तव्य व्यक्त गर्ने तरिका, क्षमता अभिवृद्धि, महिला अधिकारलगायत विविध विषयहरुमा सहजीकरण गरिएको थियो ।

तीन दिनको तालिम अवधिभरमा सैद्धान्तिक विषयको कक्षाभन्दा पनि सहभागीहरुको चाहनाअनुसार भाषण गर्ने कलाको विकास गर्नका लागि प्रयोगात्मक अभ्यासलाई बढी जोड दिइएको थियो । सहभागीहरुलाई विभिन्न समूहमा विभाजन गरी माइकको प्रयोगमा कार्यक्रम सञ्चालन र सम्बोधन गर्ने तरिका, स्वागत एवं शुभकामना मन्तव्य व्यक्त गर्न लगाइएको थियो ।

तालिमको समापनसत्रलाई सम्बोधन गर्दै प्रमुख प्रशिक्षक जिसीले तालिमको अवधिमा सिकेका र सिकाइएका विषयवस्तुलाई आगामी दिनमा पूर्ण रुपले व्यवहारमा उतार्न सहभागीलाई सुझाव दिनुभयो । मंगला सामुदायिक सिकाइ केन्द्रका अध्यक्ष लक्ष्मी सुवेदीको अध्यक्षता र सहभागी बेलकुमारी केसीको सञ्चालनमा सम्पन्न कार्यक्रममा सहायक प्रशिक्षक बानियाँले मन्तव्य व्यक्त गर्नुभएको थियो भने सहभागीद्वय पूर्णकली पौडेल र देवी अधिकारीले अनुभव सुनाउनुभएको थियो ।