Site icon BeniOnline.com.np जिल्लाका ताजा अनलाइन समाचार

लुम्लेमा नारी जागृती सहकारीको तालिम सम्पन्न

६५ औं राष्ट्रिय सहकारी दिवसको अवसर पारेर म्याग्दीको बेनी बजारस्थित नारी जागृती महिला विकास बहुउद्देश्यीय सहकारी संस्था लिमिटेडले कास्कीको लुम्लेमा २ दिने सहकारी शिक्षा तथा क्षमता अभिवृद्धि तालिम सम्पन्न गरेको छ ।

संस्थाका सञ्चालक, लेखा सुपरीवेक्षण समितिका पदाधिकारी तथा सदस्यहरु, उपसमितिका सदस्यहरु र कर्मचारीहरुलाई सहकारी ऐन नियम र व्यवसायका बारेमा जानकारी दिई थप शसक्त बनाउने उद्देश्यका साथ तालिम आयोजना गरिएको संस्थाले जनाएको छ । महिलाहरुलाई आर्थिक तथा सामाजिक रुपमा सक्षम बनाउने, योजना निर्माण गरेर व्यावसायिक तरिकाले अगाडि बढ्नका लागि तालिम सहयोगी भएको संस्थाका अध्यक्ष चिना बानियाँले जानकारी दिनुभयो ।

आवासीय रुपमा सञ्चालन गरिएको तालिममा राष्ट्रिय सहकारी बैंकका सञ्चालक राम बहादुर जिसीले सहजीकरण गर्नु भएको थियो । तालिममा सहकारीका मूल्य मान्यता, सिद्धान्त, वित्तीय साक्षरता, सञ्चालक र लेखा सुपरीवेक्षण समितिको काम कर्तव्य र अधिकार तथा कर्मचारीको भूमिकाका बारेमा जानकारी गराइएको थियो ।

संस्थाका सल्लाहकार जमुना आचार्यले सहकारी अभियानलाई प्रभावकारी रुपमा अगाडि बढाउनका लागि सञ्चालक र कर्मचारीहरुबीचको प्रभावकारी सहकार्य आवश्यक रहेको बताउनुभयो ।सहकारीका मूल्य मान्यता र आदर्शलाई आत्मसाथ गर्दै रणनीतिक योजना निर्माण गरेर संस्थालाई थप प्रभावकारी रुपमा अगाडि बढाउने प्रतिवद्धता सञ्चालकहरुले गरेका छन् । कार्यक्रम संस्थाका अध्यक्ष चिना बाँनियाको अध्यक्षता, उपाध्यक्ष दिलमाया बिटालुको स्वागत र सचिव दुर्गा केसीको सञ्चालनमा सम्पन्न भएको थियो ।

Exit mobile version