गणतन्त्र दिवसको अवसरमा बेनी नगरपालिका-९ गलेश्वरमा अवस्थित जेष्ठ नागरिक आश्रममा रहेका जेष्ठ नागरिक, संस्कृत विद्यालयका विद्यार्थीलाई भोजन गराइएको छ ।

सोमबार गणतन्त्र दिवस मुल समारोह समितिको आयोजना तथा म्याग्दी उद्योग बाणिज्य संघको ब्यवस्थापनमा गलेश्वर पुलस्तय अन्न क्षेत्र रहेका ज्येष्ठ नागरिक, संस्कृत विद्यालयमा अध्ययनरत विद्यार्थी गरी १ सयभन्दा बढीलाई भोजन गराइएको हो ।

सन्तानबाट तिरस्कृत भएका तथा बेसाहरा ज्येष्ठ नागरिकलाई कुनैपनि अभाव हुन नदिने गरी ब्यवस्थापन गर्नुपर्नेमा जिल्ला समन्वय समितिका प्रमुख एवम् मुल समारोह समितिका संयोजक राजकुमार थापाको भनाई थियो ।

घरपरिवार छोडेर आश्रममा बस्नुपर्ने बाध्यतालाई बुझेर स्वास्थ्य, खानपिन, लत्ताकपडा सहितका आधारभुत आवश्यकतालाई विषेश ध्यान दिनुपर्ने म्याग्दी उद्योग वाणिज्य संघका अध्यक्ष सुविन श्रेष्ठले बताए । आश्रममा म्याग्दीका साथै देशका विभिन्न जिल्लाबाट आएका करिव ८० बृद्धबृद्धाको बसोबास रहेको छ ।

घरपरिवारमा छोराछोरी भएका बृद्धबृद्धालाई समेत बोझ भन्दै आश्रममा छोडेर गएपछि अहिले संख्या बढेको छ । भोजन कार्यक्रममा नेकपा एमाले म्याग्दीका अध्यक्ष बालकृष्ण सुबेदी, नेकपा माओवादी केन्द्रका अध्यक्ष शेरबहादुर केसी, म्याग्दीका प्रमुख जिल्ला अधिकारी लक्ष्मण ढकाल, जिल्ला समन्वय समितिकी उपप्रमुख दिलकुमारी खत्री लगायतको उपस्थिती रहेको थियो ।

भोजन तथा दक्षिणा वितरण कार्यक्रमको सञ्चालन म्याग्दी उद्योग वाणिज्य संघका महासचिव नारायण जिसीले गरेका थिए । म्याग्दीमा गणतन्त्र दिवस प्रभातफेरी, बिरेन्द्रचोकमा दीप प्रज्वलन, ४० बर्ष देखि माथिका उमेर समूहका लागि बेनी अस्पतालमा निःशुल्क आधारभूत आँखा जाँच शिविर तथा जिल्लाका सबै स्थानीय तहमा गणतन्त्र दिवस मनाइने बताइएको छ ।

गणतन्त्र दिवसको अवसर पारेर बेनी नगरपालिका ४ सिंगा मा बृहत स्वास्थ्य शिबिर हुने भएको छ । दर्शन फाउण्डेशन र नेपाल रेडक्रस सोसाइटी, सिंगा उपशाखा, म्याग्दीको संयुक्त आयोजना तथा युनाइटेड रेफरेन्स ल्याबोरेटरी, पोखरा र बेनी अस्पताल, म्याग्दीको प्राविधिक सहयोगमा निःशुल्क स्वास्थ्य शिविर हुन लागेको हो । गणतन्त्र दिवसको अवसरमा जेठ १५गते सिंगामा सिविरको आयोजना गरिएको नेपाल रेडक्रस सोसाइटि सिंगा उपाखाका सभापति सुमन बानियाँले जानकारी दिनुभयो ।

विभिन्न सामाजिक क्षेत्रमा काम गर्दै आइ रहेको दर्शन फाउण्डेशनले स्वास्थ्यका क्षेत्रमा काम गर्दै आएको जनाएको छ । फाउण्डेसनले सिंगामा गर्ने स्वास्थ्य शिविरमा पेट, छाती, मुटु, मधुमेह तथा थाइराईड सम्बन्धी विशेषज्ञ सेवा प्रदान गर्ने जनाएको छ । त्यस्तै स्त्री तथा प्रसूती रोग सम्बन्धी विशेषज्ञ सेवाका साथै जनरल तथा ल्याप्रोस्कोपीक सेवापनि शिविरमा प्रदान गरिने छ । हाड, जोर्नी, नशा तथा बाथ रोग सम्बन्धी विशेषज्ञ सेवा तथा मधुमेह, रगतमा हुने खराब बोसो, युरिक एसिड सम्बन्धी रक्त एवं पिसाब परीक्षण समेत सिंगामै गरिने भएको छ । परिक्षण गरिएका बिरामीहरुलाइ आवश्कय सबैजसो औषधि निःशुल्क वितरण गरिने जनाइएको छ ।

जेठ १५ गते गणतन्त्र दिवसको अवसरमा आयोजना हुने शिविरमा बिहान ७ बजे देखि दिउँसो २ बजेसम्म नाम दर्ता गर्न पाइने छ । स्थित धौलागिरी माविमा हुने शिविरमा पोखरा स्वास्थ्य बिज्ञान प्रतिष्ठानका पेट छाती तथा मुटुरोग बिशेषज्ञ डा‍ कृष्णराज अधिकारी, वरिष्ठ हाड, जोर्नी, नशा तथा बाथ रोग डा सरोजचन्द्र दाहाल, जनरल तथा ल्याप्रोस्कोपीक सर्जन डा विराट शर्मा, मेडिकल अफिसर डा राज गुरुङले सेवा दिनुहुने छ । त्यस्तै बेनी अस्पतालकी निमित्त मेडीकल सुपरीटेण्डेन्ट एवम् स्त्री तथा प्रसुती रोग विशेषज्ञ, डा अन्जु थापा, मेडिकल अफिसर डा रामु सापकोटालगायतले सेवा प्रदान गर्नु हुनेछ ।