ऊर्जा, जलस्रोत तथा सिँचाइ मन्त्रालयमार्फत म्याग्दी जिल्लामा चालु आर्थिक वर्ष २०८१/८२ मा रु २१ करोड ५४ लाखको लागतमा आठ वटा योजना कार्यान्वयन भएको छ।

मन्त्रालय अन्तरगतको सिँचाइ तथा जलस्रोत व्यवस्थापन आयोजना कार्यालय कास्कीले म्याग्दी र कालीगण्डकी नदीको कटानको जोखिममा रहेका बस्तीका संरक्षणका लागि आयोजना सञ्चालन गरेको हो।

आयोजना प्रमुख विदुर श्रेष्ठले तीन सालबसाली योजना निर्माणाधीन र पाँच बहुवर्षीय योजना ठेक्का प्रक्रियामा रहेका जानकारी दिए।

बेनी, सिङ्गा, तातोपानी, दरवाङस्थित म्याग्दी, कुश्मा नगरपालिका र जलजला गाउँपालिकास्थित कालीगण्डकी नदीको कटानको जोखिममा रहेका बस्तीमा बाढी नियन्त्रणका लागि योजना सञ्चालन गरिएको हो।

बेनी नगरपालिका–४ तातोपानी स्थित सरस्वती मावी पछाडी म्याग्दी नदी किनारमा रु एक करोड ५५ लाखको लागतमा ६६ मिटर लामो, चार मिटर चौडाइ र तीन/तीन मिटर अग्लो पलम र ग्याबिन पर्खाल निर्माण काम भइरहेको आयोजनाका इञ्जिनियर नरजङ गुरुङले बताए।

निर्माण कम्पनीले यो योजना आगामी जेठ महिनाको २० गतेभित्र सम्पन्न गर्ने लक्ष्य छ। उपभोक्ता समितिमार्फत मालिका गाउँपालिका–६ दरवाङको म्याग्दी नदी किनारमा रु ७० लाखको लागतमा कम्पोजित पर्खाल निर्माण भइरहेको छ। रु ७० लाख बजेट विनियोजन भएको बेनी–४ सिङ्गा र सुर्केमेलामा म्याग्दी नदीको कटान रोकथामका लागि ग्याबियन पर्खाल निर्माण गर्ने योजना निर्माणाधीन छ।

जिल्ला प्रशासन कार्यालय, जिल्ला अदालत, दरवाङ बसपार्कलगायत भौतिक संरचनालाई म्याग्दी नदीको कटानबाट जोगाउन ६५ मिटर लामो कम्पोजित पर्खाल निर्माणका लागि रु छ करोड १८ लाख लागत अनुमान गरिएको योजना ठेक्का प्रक्रियामा छ।

तातोपानी बजार संरक्षणको दोस्रो प्याकेज अन्तरगत म्याग्दी नदी किनारमा एक सय दुई मिटर कम्पोजिट पर्खाल निर्माणका लागि रु तीन करोड ८१ लाख लागत अनुमान गरिएको ठेक्का मूल्याङ्कनको अन्तिम चरणमा छ।

कुश्मा नगरपालिका–४ अर्मादी र जलजला गाउँपालिका कार्यालय रहेको लामाखेतस्थित कालीगण्डकी नदी किनारमा रु पाँच करोड लागत अनुमान गरिएको नदी संरक्षण योजना सञ्चालन गरेको छ। यो योजना पनि मूल्याङ्कनको अन्तिम चरणमा पुगेको आयोजनाले जनाएको छ।

उक्त योजनामार्फत दुवै स्थानमा ४८/४८ मिटर लम्बाई भएको कम्पोजिट पर्खाल निर्माण गरिने छ। बेनीको कालीपुल पारी जलजला गाउँपालिका–३ स्थित कालीगण्डकी नदी किनारमा ८० मिटर कम्पोजिट पर्खाल निर्माण गर्नका लागि रु दुई करोड ८० लाख लागत अनुमान गरिएको योजना सञ्चालनको तयारी गरिएको आयोजनाले जनाएको छ।

आयोजनाले पछिल्लो पाँच वर्षयता बेनी र आसपासको क्षेत्रमा नदी नियन्त्रणको काम गर्दै आएको छ। रासस

जनप्रिय मा. वि. दरबाङका जग्गादाता, समाजसेवी, शिक्षाप्रेमी क्या. स्व. करवीर फगामीको शताब्दियौं जयन्ति मनाइएको छ। उक्त अवसरमा लोकप्रिय साहित्यकार अजयमिलन श्रेष्ठको २७ औं कृति ‘कर्मयोगी करवीर र कर्मवीरहरू’ पुस्तक विमोचन गरिएको थियो ।

पुस्तक विमोचन तथा लोकार्पण कार्यक्रमका प्रमुख अतिथि मालिका गाउँपालिकाका अध्यक्ष वेगप्रसाद गर्बुजा, विशिष्ट अतिथि जेष्ठ नागरिक द्वय लवीर फवाङ्गी र दिलमाया ‘डेकमा’ रोकाले संयुक्त रुपमा पुस्तक विमोचन गरेका थिए ।
प्रमुख अतिथि गर्बुजाले क्या. करवीर फवाङ्‌गी र समाजसेवी व्यक्तित्वको योगदान र भूमिकालाई अभिलेखन गरेकोमा लेखकलाई धन्यवाद ज्ञापन गरेका थिए । आफ्नो प्रमुख आतिथ्यता मन्तव्यमा गर्बुजाले शिक्षाप्रेमी समाजसेवीहरूका बारेमा स्थानीय पाठ्यक्रममा समावेश गरी उनीहरूको योगदानको स‌म्मान गरिने प्रतिबद्धता जाहेर गरेका थिए ।
जीवनी सङ्ग्रह पुस्तकमा स्व. फवाङ्‌गी लगायत अन्य बाह्र जना समाजसेवीहरूको जीवनी समाहित छ । पुस्तक फवाङ्गीका पत्नी स्व. नन्दमतिप्रति समर्पित छ । उक्त ऐतिहासिक र महत्त्वपूर्ण कार्य गरेको भन्दै आयोजक फवाङ्गी परिवारद्वारा प्रकाशक सृजना श्रेष्ठलाई नगदसहित कदर-पत्र प्रदान गर्नुका साथै लेखक श्रेष्ठलाई एकलाख पाँच हजार रुपैंया प्रोत्साहन पुरस्कार सहित सम्मान गरिएको थियो ।
फवाङ्गी दम्पति क्या. करवीर र नन्दमतिको तस्बिरमा माल्यार्पण गर्दै प्रकाशक सृजना श्रेष्ठको स्मृतिगानबाट शुरु गरिएको कार्यक्रममा जीवनी समाहित दिवङ्‌गत सत्पात्रका सुपुत्रजन नरसिंबहादुर खत्री, दुर्गबहादुर खत्री र चन्द्रबहादुर छन्त्यालले मन्तव्य व्यक्त गरेका थिए । कार्यक्रममा शिक्षक बालकृष्ण शर्माले क्या. फवाङ्‌गीको जीवनी वाचन गरेका थिए ।
फवाङ्गी परिवार‌को आयोजनामा भएको उक्त कार्यक्रमको अध्यक्षता स्व. करवीरका जेठा छोरा शिवनारायण फगामीले गरेका थिए । के. बि. एकेडेमीका प्रिन्सिपल विमल शर्माको सञ्चालन, एकेडेमी कै संस्थापक निर्देशक हिरा पुनको स्वागत मन्तन्य रहेको कार्यक्रममा स्व. फवाङ्‌जीका छोरी ज्वाइँ खिमबहादुर पूर्जाले धन्यवाद मन्तव्य राखेका थिए ।

म्याग्दी कोराला यातायात प्रालिले विद्यार्थीलाई परिचयपत्रको आधारमा विद्यार्थीलाई छुट सुविधा सार्वजनिक गरेको छ । कोरला यातायात प्रालिले लामो दुरीको यातायात भाडा दरमा विद्यार्थीलाई सहुलियत छुट दिने घोषणा गरेको हो ।

म्याग्दी कोरला यातायात प्रालिले म्याग्दी जिल्ला भित्र र पर्वतको जलजला गाउँपालिका भित्रका विद्यार्थीकालागी परिक्षण स्वरुप गत शुक्रवार साँझदेखी लागु हुने गरी बेनी–काठमाण्डौ, पोखरा समेतका लामो दुरीका बसमा छुट दिन लागेको प्रालिका अध्यक्ष मोहन केसीले बताउनुभयो ।

बेनीदेखी काठमाण्डौसम्मका बस भाडा एक हजार पाँच सय र पोखरासम्मको भाडा ५ सय रहेकोमा कोरला वसले पहिलो चरणमा तोकिएका क्षेत्रका २५ बर्ष भित्रका विद्यार्थीका लागी ३० प्रतिशत र २५ बर्षभन्दा माथीका विद्यार्थीकालागी १५ प्रतिशत टिकटमा छुट दिन लागेको अध्यक्ष केसीको भनाई छ ।

यसअगाडी दिर्घरोगी र ओमकुमारी शान्ति कोषको सिफारिसमा बिरामीलाई निशुल्क सेवा दिइरहेको कोरलाले अपाङ्गता भएका व्यक्तिहरू र जेष्ठ नागरिकहरूका लागि ५० प्रतिशत छुट नियमित प्रदान गर्ने गरेको छ ।

कोरालाका अनुसार परीक्षण अवधिमा छुट सुविधा जारी रहनेछ र जिल्लास्तरीय सरोकारवाला निकायले अन्य निर्णय नगरेसम्म यो व्यवस्था कायम रहनेछ । हरेक महिना छुट दिएका विद्यार्थीको विवरण सहितको जानकारी सम्बन्धित निकायलाई समेत उपलब्ध गराइने छ । म्याग्दीका विद्यार्थी संगठनले जिल्लाभित्र र बाहिरी सहरमा जाने सार्वजनिक सवारीसाधनमा छुटको माग गरिरहेको अवस्थामा कोरला बसले पहिलो छुट सुविधा घोषणा गरेको हो ।