भौगोलिक रूपमा दुर्गम क्षेत्रमा अवस्थित म्याग्दीको धवलागिरि गाउँपालिकाले वडामै पुगेर उपभोक्ता समितिसँग योजना सम्झौता गर्न थालेको छ । वडामै योजना सम्झौता हुँदा उपभोक्ता समितिलाई झन्झट हट्नुका साथै समय र खर्चको बचत भएको छ ।

गाउँपालिकाको केन्द्र मुनामा पुगेर योजना सम्झौता गर्न अपायक पर्ने वडा नं ६ मराङ र ५ मल्कवाङका उपभोक्ता समितिलाई लक्षित गरेर घुम्ती शिविर सञ्चालन गरेको छ । मराङमा चालु आर्थिक वर्षमा बजेट विनियोजन भएका १८ वटा योजनाको वडा कार्यालयमा सम्झौता गरिएको वडाध्यक्ष राजाराम सुवेदीले जानकारी दिए ।

मङ्गलबार मल्कवाङको वडा कार्यालयमा घुम्ती शिविर सञ्चालन गरेर योजना सम्झौता गरिने भएको छ । वडामै योजना सम्झौता हुँदा उपभोक्ता समितिका पदाधिकारीलाई पालिकामा जाने आउने समय, झन्झट हट्नुका साथै व्ययभार घटेको अर्वाङ–थापाघडेरी मोटरबाटो निर्माण समितिका अध्यक्ष पदमबहादुर गर्बुजाले बताए ।

“मुना पुग्न, काम गर्न र फर्कन उपभोक्तालाई कम्तीमा दुई दिन लाग्ने गर्छ”, उनले भने, “वडामै योजना सम्झौता भएपछि एउटा उपभोक्ता समितिका कम्तीमा तीन जनाको पालिका जाने आउने समय र खर्च बचत भएको छ ।” मराङ र मल्कवाङका बासिन्दालाई धवलागिरिको केन्द्र मुनामा पुग्न मालिकाको केन्द्र दरबाङ धारापानी ताकम हुँदै घुमाउरो यात्रा गर्नुपर्छ । पालिकाको आर्थिक कारोबार हुने प्रभु बैंकको शाखा ताकममा छ । मुनामा बैंकको शाखा नभएकाले खाता खोल्ने र आर्थिक कारोबारका लागि ताकम पुग्नुपर्छ ।

पालिकाको केन्द्र र बैंकको शाखा एकै ठाउँमा नहुँदा मल्कवाङ, मराङ र ताकमका सेवाग्राहीलाई झञ्झटपूर्ण उल्टो यात्रा गर्नुपर्छ । मराङ र मल्कवाङका उपभोक्तालाई आर्थिक कारोबार गर्न ताकमभन्दा दरबाङमा रहेको बैंकको शाखाबाट सजिलो र पायक पर्छ । पालिकाको आर्थिक कारोबार हुने प्रभु बैंकको शाखा ताकममा छ ।

मुनामा बैंकको शाखा नभएकाले खाता खोल्ने र आर्थिक कारोबारका लागि ताकम पुग्नुपर्छ । प्रमुख प्रशासकीय अधिकृत धुव्र रिजालको नेतृत्वमा योजना शाखाका रमेश पौडेल, लेखा शाखाका तिलक पौडेल, पूर्वाधार शाखाका लोकेन्द्र रावल, जनक धानुकको टोली घुम्ती शिविर लिएर मराङ पुगेको हो ।

वडाका जनप्रतिनिधिले सहजीकरण तथा समन्वय गर्नुभएको छ । प्राविधिक टोलीले यसअघि नै योजनाको लागत अनुमान र डिजाइन तयार पारेका थिए । सबै प्रक्रिया पूरा गरेर योजना सम्झौता गरी पायक पर्ने ठाउँको बैंकको शाखामा गएर खाता खोल्न सिफारिस गरी पेश्की उपलब्ध गराउने व्यवस्था मिलाइएको छ ।

योजना सम्झौता गर्न आएका उपभोक्ता समितिका पदाधिकारीलाई प्राविधिक, लेखा व्यवस्थापन र प्रशासनिक प्रक्रियाका विषयमा परामर्श पनि दिइएको प्रशासकीय अधिकृत रिजालले बताए । आवश्यकता र मागका आधारमा अन्य वडामा पनि योजना सम्झौता गर्न जान सकिने प्रशासकीय अधिकृत रिजालले बताउनुभयो । ठूला योजना ठेक्का प्रक्रिया अघि बढाउन र उपभोक्ता समितिमार्फत कार्यान्वयन गर्ने योजना सम्झौतामा तीव्रता दिइएको छ । चालु आर्थिक वर्षमा एक सय २० वटा पूर्वाधारसम्बन्धी योजना छनोट गरेको धवलागिरि गाउँपालिकाले चारवटा ठेक्का सम्झौता गरेको छ ।

म्याग्दीका युवा सुजन बरुवालको नेपाल जेसीजको कार्यकारिणी उपाध्यक्षमा उम्मेदवारी दिनुभएको छ । सन २०२३ का लागी हुन लागेको निर्वाचनमा म्याग्दीबाट बरुवालले राष्ट्रिय राष्ट्रिय कार्यकारिणी उपाध्यक्षमा उम्मेदवारी दिनुभएका हो । सन २०२१ मा नेपाल जेसीजको राष्ट्रिय उपाध्यक्ष समेत भैसक्नुभएका बरुवालले यस बर्ष पुस ७ देखि १० गतेसम्म बिरगंजमा हुन लागेको ४९ औँ राष्ट्रिय महाधिवेशनमा उम्मेदवारी दर्ता गरिसक्नुभएको छ ।

बरुवाल उम्मेदवार बन्नुभएको कार्यकारिणी उपाध्यक्षमा ४ जनाको पदमा ११ जनाले मनोनयन दर्ता गराएका छन् । सन २०१४ मा प्रस्तावित सदस्यको रुपमा म्याग्दी जेसीजमा आबद्ध हुनुभएका बरुवाल सन २०१५ मा साधारण सदस्य, सन २०१७ मा शाखाको उपाध्यक्ष, २०१८ मा कोषाध्यक्ष, २०१९ मा कार्यकारिणी उपाध्यक्ष र २०२० मा म्याग्दी जेसीजको शाखा अध्यक्ष भएर नेतृत्व सम्हाल्नुभएको थियो । उहाँले सन २०२२ मा म्याग्दी शाखाको कानुनी सल्लाहकार भएर समेत काम गर्नुभएको छ ।

कार्यक्रम संयोजक लगायतका जेसीज गतिविधिमा संलग्न भएर थुप्रै राष्ट्रिय अवार्डहरु समेत प्राप्त गरिसक्नुभएका बरुवालले युवाहरुको नेतृत्व, व्यत्तित्व र क्षमता विकासको क्षेत्रमा थप रचनात्मक कार्यहरु गर्नको लागि राष्ट्रिय कार्यकारिणी उपाध्यक्ष पदमा उम्मेदवार बनेको बताउनुभयो ।

नेपाल जेसीजमा यस अघि सन २०१५ मा म्याग्दीबाट धनञ्जयकुमार श्रेष्ठले राष्ट्रिय अध्यक्ष पदमा उम्मेदवार बनेर बिजय हाँसील गर्नुभएको थियो । नेपाल जेसीजमा १ अध्यक्ष, ४ कार्यकारिणी उपाध्यक्ष र १२ उपाध्यक्ष पदका लागि निर्वाचन हुने गर्छ । हरेक बर्ष नेतृत्व हस्तान्तरण हुने जेसीजमा एक व्यक्ति एक पदमा एक पटक मात्रै रहन पाउने प्रावधान रहेको छ ।

काठमाण्डौको टिचिङ अस्पतालको बाल कक्षको बेड नं ८७९ मा करिब दुई साता बसेका ९ महिने शिशु आरभ सिर्पालीको टाउकोको तेस्रो शल्यक्रिया पछि घर फर्किएका छन् । जन्मिएको केहीदिनमा अस्वभाविक रुपमा टाउको फुलेपछि आमाको काखमा छटपटाइरहेको अवस्थामा विभिन्न माध्यमबाट प्राप्त सहयोगले केही राहत भएपनि नियमित चेकजाँच र औषधी उपचारका लागि चिकित्सकल दिएको तालिकाले मनदेवी घर्ती छटपटाइरहेकी छन् ।

गएको जेठ महिनायता २ पटक टाउकोको शल्यक्रिया गरिएपनि निको नभएपछि चिकित्सकको सल्लाह अनुसार तेस्रो शल्यक्रियाका लागि अस्पतालमा पुगेकी म्याग्दी धवलागिरी गाउँपालिका वडा नं ४ मुदीको खिवाङकी मनदेवी अहिले अस्पतालबाट फर्किएपनि थप उपचारका लागि अझै लाग्ने खर्च जुटाउन हम्मेहम्मे परेको छ ।

तेस्रो शल्यक्रियापछि चिकित्सकले थप तयारी गर्नुपर्ने संकेत देखाएपछि अस्पतालमै भक्कानिएकी मनदेवीसँग अवछोराको उपचारमा आवश्यक पर्ने आर्थिक छैन् । जीवनमरणको दोसाँधमा रहेका छोरालाई मनदेवीले करिब १० लाखभन्दा बढी खर्च गरेकी छन् ।

असह्य पीडाले काखमा रुँद छटपटाइरहेको छोराको उपचारमा जुटाएको आर्थिक सकिएपछि अस्पतालबाट भक्कानिदैं पोखरामा रहेको कोठामा आइपुगेकी मनदेवीले सहयोगीदातासँग पुनःसहयोगको याचना गरेकी छन् । छोराको उपचारलाई केही सहज बनाउन र घरखर्च चलाउन भन्दै तीन महिना अगाडी मलेसिया गएका श्रीमान राम सुनारले समेत खर्च पठाउन सकेका छैनन् ।

पटक–पटक औषधी उपचारका लागि अस्पतालमा जानुपर्ने,शल्यक्रिया सहित नियमित औषधी सेवनमा लाग्ने खर्च जुटाउन नसकेपछि मनदेवीले छोरोको उपचारका लागि जीवनको भिख मागिरहेकी छिन् शिशुलाई चिकित्सकले सिफारिस गरेको पोषण लगायतको खानेकुरा समेत खुवाउन समस्या भइरहेको छ ।  ‘विष खाएर मरौँ भने छोराकोमाया लाग्छ । उपचार गरौँ भने पैसा छैन ।’ चिकित्सकले नियमित उपचारमा अझै आर्थिक सकिने बताएपछि उनले सबैसँग आर्थिक सहयोगको याचना गरिरहेकी छिन् ।

छोराको उपचारका लागि मात्रै नभई सामान्य खर्च गर्ने पैसाको जोहो गर्न नसक्ने अवस्था भएपछि मनदेवीले अस्पतालको शैयाबाटै सहयोगको याचना गरेकी छन् । ‘तेस्रो अप्रेसन सकियो, केहीदिनका लागि घरमा जानु भनेको छ,भएको पैसा पनि उपचारको क्रममा सकिएपछि अहिले आर्थिक अभावले थप पीडा दिएको छ’ उनले भनिन् ।  ‘अहिले थोरैथोरै सहयोग जुटेको छ, अझै धेरै खर्च लाग्छ’मनदेवीले भनिन् ।

यसैबीच शिशुको थप उपचारका लागि आर्थिक संकलन अभियान समेत सुरु गरिएको आशिष परियारले बताए । उनका अनुसार आर्थिक सहयोगसँगै काठमाण्डौमा भएकालाई अस्पतालमा पुगेर समेत सहयोग गर्न अपिल गरेका छन् । शिशुको नयाँ जीवनको आशामा हालसम्म संकलन भएको आर्थिक हस्तान्तरण गरिएको र सहयोगका लागि सबैसामु अपिल गरेको उनले बताए ।

चरम गरिबीकै कारण आमाले आत्महत्या गरेपछि विचल्लिमा परेमा परेकी बेनी नगरपालिका-२ हाडेभिरकी बालिका अमृता किसानलाई समाजसेवी सवी थापाले निजी विद्यालयमा आवासीय सुविधासहित उच्च शिक्षा पढ्न आवश्यक सबै खर्चको घोषणा गरिन् ।  विगत ४ बर्षदेखि समाजसेवी थापाले बार्षिक ६० हजार खर्च सहित शैक्षिक साम्रागी, पोशाक लगायतको खर्च गरेकी छन् ।

बेनी नगरपालिका–४,थामडाँडा घर भई हाल अमेरिकामा रहेकी समाजसेवी सवी थापा र इन्द्र थापा दम्पत्तीले अभिभावकत्व ग्रहण गरेपछि अमृता लगातार विद्यालयमा सर्वोत्कृष्ट नतिजा ल्याएकी छन् । आर्थिक अभावकै कारण विद्यालय प्रवेश गर्न नपाएकी अमृताजस्तै अभिभावक विहिन दुई बालबालिकालाई उच्च शिक्षा र एक छात्रलाई स्नातक तहमा लाग्ने सबै खर्च समाजसेवी थापाले नै जिम्मा लिएकी छन् ।

अभिभावकविहिन बालबालिकालाई आर्थिक तथा उच्च शिक्षासम्मको यात्रामा नियमित सहयोग गदैं आएकी थापाले स्थापना गरेको इशा फाउण्डेशनमार्फत बेनी नगरपालिका–१,रत्नेचौरमा रहेको भानु मावि, बेनपा–४, थामडाँडाको भृकुटी आधारभुत विद्यालयमा अध्ययनरत आर्थिक अवस्था कमजोर भएका बालबालिकालाई छात्रबृद्धि सहितको सहयोगका लागि २ लाखको अक्षय कोष स्थापना गरिएको छ।

केहीदिन अगाडी आफुँले विद्यालयतहको शिक्षा प्राप्त गरेको धौलागिरी माविको बहिरा स्रोत कक्षामा अध्ययनरत विद्यार्थीलाई लक्षित गरी २ लाखको कोष स्थपाना गरेको समाजसेवी थापाले बताईन् । ‘जन्मदिने आमाबुबा नभएका धेरै बालबालिकालाई सहयोग गरेको छु,‘मानवीय सेवामा बाँचुन्जेल सहयोग गर्ने चाहना छ’ समाजसेवी थापाले भनिन् ।उनले गरिबीकै कारण विद्यार्थीले भोग्नु परेको समस्या सुन्दा आँशु थाम्नै नसक्ने बताईन् ।

समाजसेवी थापाले गरिबीकै कारण शिक्षा, स्वास्थ्योपचार, लालनपालन लगायतको आवश्यक खर्चको अभावले कष्टकर जीवन विताउन बाध्य भएकालाई सहयोग तथा मुटुरोग शिविर सहित विभिन्न अभियानमा समेत सहयोग गरेको इशा फाउण्डेशन म्याग्दीकी प्रतिनिधि चन्द्रा घलेले बताईन् ।

उनले समाजसेवी थापाले १७ जनाभन्दा धेरै बालबालिकालाई बार्षिक पोशाक, स्टेशनरी सहितका साम्रागी सहयोग गर्ने गरेको जानकारी दिईन् । लगनशील, मिहनेती तथा अनुशासित विद्यार्थीले आर्थिक अभावकै कारण आधारभुत तहदेखि उच्च शिक्षासम्मको पढाई रोकेर घरमै बस्ने गरेकालाई म्याग्दी जिल्ला बाहिर समेत धेरै सहयोग गरेको इशा फाउण्डेशनले जनाएको छ ।

म्याग्दीको रघुगंगा गाउँपालिकाले वडा नं.१ तिप्ल्याङमा ४५ दिने निशुल्क कुक तालिम सुरु गरेको छ । मंगलबारदेखि तिप्लायङमा ‘गरिबी निवारणका लागि लद्यु उद्यम विकास कार्यक्रम’ अन्र्तरगत ४५ दिने व्यवासायिक कुक तालिमको शुभारम्भ गरिएको हो । ४५ दिन सम्म सञ्चालन हुने तालिममा गाउँपालिका भित्रका ४० जनाको सहभागिता रहेको छ ।

तालिममा तिप्याङका २५ जना र प्रत्येक वडामा सञ्चालन भएका होमस्टेबाट दुई÷दुई जना गरि ४० जनालाई तालिम दिईने गाउँपालिले जनाएको छ । तालिममा सहभागीलाई काठमाडौा एसिएन हस्पीलाटी एकेडेमीका रविन घले र अविसेक दियालीले प्रशिक्षण दिने गाउँपालिकाका शिक्षा अधिकृत कृष्णप्रसाद सुबेदीले बताउनुभयो ।

तालिमको उद्घाटन कार्यक्रममा गाउँपालिका अध्यक्ष भव बहादुर भण्डारीले सिपमुलक तालिम मार्फत युवाहरुलाई आर्थिक आयआर्जन संग जोड्न तालिमको आयोजना गरिएको बताउनुभयो । उहाँले यो आर्थिक बर्ष विभिन्न कार्यक्रम अन्तरगत करिब एक हजार जनालाई सिपमुलक तालिम दिईने बताउनुभयो । ‘हामीले विशेष युवाहरु लक्षित तालिमको आयोजना गरेका छौँ,यसले युवाहरुले रोजगारीको अवसर पाउछन् ।’ तालिममा सहभागीलाई नेपाली, इन्डेन, चाइनिज, कन्टीडेन्टल लगायतका खानाका परिकार बनाउन सिकाईने प्रशिक्षक घलेले बताउनुभयो । तालिमको उद्घाटन कार्यक्रम वडा सदस्य बलमान गौचनको अध्यक्षता, सुबेदीको सञ्चालनमा सम्पन्न भएको थियो ।

म्याग्दी जेसीजले रघुगंगा गाउँपालिका–३ मा रहेको हिमालय आधारभूत विद्यालयका विद्यार्थीहरुलाई न्यानो कपडा वितरण गरेको छ । मंगलवार विद्यालयमा आयोजिक एक कार्यक्रमका बिच म्याग्दी जेसीजले सञ्चालन गरेको ‘न्यानो माया’ कार्यक्रम अन्तरगत विद्यालयमा कक्षा १ देखि ५ सम्म अध्ययनरत २६ जना बालबालिकाहरुलाई विद्यालय पोशाकको स्विटर वितरण गरेको हो ।

कार्यक्रममा म्याग्दी जेसीजका शाखा अध्यक्ष सन्दिप खत्री र रघुगंगा गाउँपालिकाका प्रमुख प्रशासकीय अधिकृत कृष्णप्रसाद ढकालले विद्यार्थीहरुलाई जाडो मौसममा विद्यालयमा आउँदा लगाउनका लागि विद्यार्थीहरुलाई स्विटर वितरण गर्नुभएको थियो । छाडो याममा बालबालिकाहरुलाई न्यानोको प्रत्याभूति दिलाउन अर्जन सपिङ सेन्टरको सहयोगमा संस्थाले बालबालिकाहरुलाई स्विटर उपलब्ध गराएको शाखा अध्यक्ष खत्रीले बताउनुभयो ।

कार्यक्रममा रघुगंगा गाउँपालिकाका प्रमुख प्रशासकीय अधिकृत ढकाल र विद्यालय व्यवस्थापन समितिका अध्यक्ष रेशम कटुवालले ग्रामिण क्षेत्रका सामुदायिक विद्यालयमा गरिब तथा विपन्न परिवारका विद्यार्थीहरु अध्ययनरत रहेको अवस्थामा जाडो याममा विद्यार्थीहरुलाई न्यानो कपडा उपलब्ध गराएर जेसीजले रचनात्मक कार्य गरेको भन्दै धन्यबाद ज्ञापन गर्नुभएको थियो । उक्त अवसरमा बालकक्षामा अध्ययनरत विद्यार्थीहरुलाई स्टेशनरी सामाग्री प्रदान समेत गरिएको थियो ।
युवाहरुको नेतृत्व र व्यक्तित्व विकासमा क्रियाशिल म्याग्दी जेसीजले विद्यार्थीहरुको खेल तथा कला र संस्कृति लगायतका लुकेका प्रतिभा उजागरमा विभिन्न कार्यक्रमहरु समेत सञ्चालन गर्दै आएको छ । यस अघि गत मंसिरमा म्याग्दी जेसीजले बेनी नगरपालिका– ९ घुरेपानीमा रहेको स्यालीखेत आधारभूत विद्यालयका ३६ जना विद्यार्थीहरुलाई न्यानो कपडा वितरण गरेको थियो ।

म्याग्दी जेसीजका कार्यकारिणी उपाध्यक्ष कुमार बानियाँको स्वागत, सुनिता बेलबासेको जेसीज आस्थापाठ र कार्यक्रम संयोजक कृष्णप्रसाद शर्माको सञ्चालनमा कार्यक्रम सम्पन्न भएको थियो ।