स्वतन्त्र विद्यार्थी यूनियन म्याग्दी बहुमुखी क्याम्पसले आयोजना गरेको रक्तदान कार्यक्रममा २२ पिन्ट रगत सङ्कलन भएको छ। क्याम्पसमा अध्ययनरत विद्यार्थीलाई रक्तदानमा आर्कषित गर्ने उदेश्यले आयोजित कार्यक्रमको प्रतिनिधिसभा सदस्य खमबहादुर गर्बुजाले उद्घाटन गर्नुभयो ।

रगतको अभावकै कारण कसैले ज्यान गुमाउन नपरेको भनेर म्याग्दीमा हुने रक्तदान कार्यक्रमबाट बाहिरी जिल्लामा समेत पठाएर धेरैको ज्यान जोगाउने गरिएको प्रमुख अतिथि गर्बुजाले बताउनुभयो । रक्तदान कार्यक्रम अत्यन्त सराह्रनीय रहेकाले आगामी दिनमा पनि सामाजिक गतिविधिहरुलाई निरन्तरता दिनुपर्नेमा जोड दिनुभयो ।

नेपाल रेडक्रस सोसाईटी रक्तसञ्चार केन्द्रको प्राविधिक सहयोगमा सञ्चालित रक्तदान कार्यक्रममा क्याम्पस सञ्चालक समितिका अध्यक्ष दिपेन्द्र श्रेष्ठ, कोषाध्यक्ष शेरबहादुर केसी, क्याम्पस प्रमुख श्रीधर सुबेदी, जिल्ला खेलकुद विकास समितिका अध्यक्ष सुमन श्रेष्ठ, रघुगंगा गाउँपालिकाका प्रबक्ता एवम् वडा नं ६ का वडा अध्यक्ष मनकुमार शेरपुञ्जा, बेनपा ७ का वडा सदस्य विश्वास श्रेष्ठ लगायतको उपस्थिती रहेको थियो।

रक्तदान कार्यक्रमको अध्यक्षता स्ववियु सभापति संगम चोखाल, स्वागत उपाध्यक्ष रेजिना भण्डारी र सञ्चालन सचिव मञ्जुल कटुवालले गर्नुभएको थियो । म्याग्दीमा आपतकालिन र प्रकोपमा परेका व्यक्तिहरु, रक्तस्रावसँग सम्बन्धित रोग वा समस्या भएका,शल्यप्रक्रियामा रहेका बिरामीहरू,गम्भीर रक्तअल्पता भएका गर्भवती महिलाहरू लगायत उपचारमा रगतको आवश्यकता पर्दा तत्कालै रक्तदान गर्नेहरुको संख्या समेत धेरै छन् ।

सदरमुकाम बेनी बजार क्षेत्रमा सञ्चालित औषधि पसल तथा क्लिनिक एवम् मानव स्वास्थ्य सँग सम्बन्धित संस्थाको अनुगमन गर्ने क्रममा एउटा पसलका सञ्चालक पसल बन्द गरेर भागेका छन् । बजार अनुगमनका लागि जिल्ला प्रशासनको नेतृत्वमा पर्यटन तथा उद्योग कार्यालयलगायतको अनुगमन टोली औषधि पसल पुग्नै लाग्दा पसल बन्द गरेर भागेका हुन् ।

बेनी नगरपालिका ८ को गणेश टोलमा रहेको प्रयास मेडिकल स्टोर्सका सञ्चालकले बजार अनुगमन टोली आउँदै गरेको जानकारी पाए पछि पसल बन्द गरेर भागेका हुन् ।

अनुगमनमा नवीकरण नगरी सञ्चालन गरेको, कागजात नभेटिएको, औषधि बिक्री गर्दा मूल्य सूची अनुसार नबेचिएको, म्याद सकिएका औषधि समेत एकै ठाउँमा राखेर बिक्री गरेको पाइएको थियो । अनुगमन गरिएका हरेक पसलमा कुनै न कुनै समस्या भेटिएको पर्यटन तथा उद्योग कार्यालयले जनाएको छ ।

अनुगमनमा चिकित्सकले समेत शरीरमा भिटामिन, मिनिरल र अन्य आवश्यक तत्त्व खानाबाट पूर्ति नभएको भन्दै बिरामीलाई फुड सप्लिमेन्टलाई औषधिको नाममा सिफारिस गर्ने गरेको समेत भेटिएको जनाइएको छ । औषधि पसलले बिरामीलाई औषधि बाहेक विभिन्न बहानामा अनावश्यक खर्च गराउने गरेको गुनासो समेत आएको पर्यटन तथा उद्योग कार्यालयका प्रमुख अमृतप्रसाद कँडेलले बताउनुभयो ।

नवीकरण नभएकालाई दुई दिनको समय दिएर सबै कागजात पुरा गर्न निर्देशन गरिएको थियो । अनुगमन टोलीकी संयोजक सहायक प्रमुख जिल्ला अधिकारी अनिशा आचार्यले औषधि, डेन्टल र ल्याब सेवा मापदण्ड विपरीत सञ्चालन गर्न नदिने बताउनुभयो ।

बेनीमा रहेको निलगिरी डेन्टल केयर सेन्टर, न्यु युगल फार्मेसी, पाण्डे मेडिकल हल, युगल डेन्टल केयर सेन्टर, ढकाल मेडिकल हल, न्यु ढकाल ल्याब, बेनी सन्जिबिनी हेल्थ क्लिनिक, कोर स्माइल डेन्टल केयर सेन्टर र म्याग्दी डेन्टल होममा अनुगमन गरिएको थियो ।अनुगमनको क्रममा एउटा डेण्टल हाउसको कागजात नभएको पाइएको र अनुगमन भएका सबै फर्महरूमा कमजोरी भेटिएको अनुगमनमा सहभागी नेपाल पत्रकार महासङ्घका अध्यक्ष हरिकृष्ण गौतमले जानकारी दिनुभयो ।

‘पूर्णखोप सुरक्षित भविष्य’ भन्ने मूल नारासहित म्याग्दीको धवलागिरि गाउँपालिका पूर्णखोप सुनिश्चितता एवं दिगोपना घोषित भएको छ । धवलागिरि गाउँपालिकाको आयोजनामा सोमबार एक समारोहबीच गाउँपालिकालाई पूर्णखोप सुनिश्चितता तथा दिगोपना पालिकाको रुपमा घोषणा गरिएको हो ।

बच्चा जन्मिएको १६ महिनादेखि ५९ महिनासम्म गाउँपालिकाभित्र रहेका कुल ६ सय ३१ जना बालबालिकाहरुले पूर्णखोप पाएको सुनिश्चितासहित पालिकालाई पूर्ण खोपको दिगोपना कायम राख्ने प्रतिबद्धता जनाउँदै पूर्णखोप सुनिश्चित दिगोपना पालिकाको रुपमा घोषणा गरिएको धवलागिरि गाउँपालिकाले जनाएको छ । पालिकामा १५ महिनाभन्दा मुनिका बालबालिकाहरुले पनि नियमित खोप लगाइरहेका छन् ।

राष्ट्रिय खोप तालिकाअनुसार तोकिएका उमेर समूहका बालबालिकाहरुले सबै खोपको मात्रा पुरा गरेको तथा खोप निर्देशिका अनुसार आवश्यक सबै प्रक्रियाहरु पुरा गरेर गाउँपालिकालाई पूर्णखोप सुनिश्चितता दिगोपना पालिकाको रुपमा घोषणा गरिएको स्वास्थ्य शाखा प्रमुख सम्झना खाती क्षत्रीले बताउनुभयो । बालबालिकाहरुले १५ महिनादेखि ५९ महिनासम्म पोलियो, दादुरा, हेपाटाईटिस, जापानीज ईन्सेफ्लाईटिस, रुबेला, झाडापखाला, टाईफाइडलगायत रोगहरुको विरुद्धमा पाउनुपर्ने विभिन्न १३ प्रकारका खोपको सबै मात्रा पुरा गरेका छन् ।

धवलागिरि गाउँपालिकालाई पूर्णखोप सुनिश्चितता पालिकाको रुपमा घोषणा गर्नका लागि यसअघि गएको चैत १७ गतेबाट वडास्तरमा कार्यक्रम गरी वडालाई पूर्णखोप सुनिश्चित वडाको रुपमा घोषणा गर्ने कार्य सुरु गरिएको थियो । पालिकाको सबै घरधुरीमा सर्वेक्षणसहित ५९ महिनासम्मका सबै बालबालिकाहरुको विवरण सङ्कलन गरी उनीहरुलाई पूर्णखोप लगाउनुका साथै पुनः सर्भेक्षण समेत गरिएको थियो । गूर्जा, लुलाङ, मुना, मुदी, मल्कबाङ, मराङ र ताकमसहित ७ वटा वडा रहेको धवलागिरिको यी सबै वडालाई पूर्णखोप सुनिश्चितता एवं दिगोपना घोषणा गरिसकेपछि आज पालिकालाई औपचारिक रुपमा पूर्णखोप सुनिश्चितता घोषणा गरिएको हो ।

पूर्णखोप सुनिश्चितता पालिका घोषणा समारोहको उद्घाटन गर्दै जिल्ला समन्वय समिति म्याग्दीका कार्यवाहक प्रमुख डिलकुमारी खत्रीले पूर्णखोप सुनिश्चित दिगोपना कायमसहित खोप कार्यक्रमलाई आगामी दिनमा पनि निरन्तरता दिनुपर्ने बताउनुभयो । जिल्ला खोप समन्वय समितिको संयोजक समेत रहनुभएकी कार्यवाहक प्रमुख खत्रीले भौगोलिक हिसाबले जिल्लाको विकट ठाउँमा रहेको धवलागिरि गाउँपालिका जिल्लामै पहिलो पूर्णखोप सुनिश्चित पालिकाको रुपमा घोषणा हुन सफल भएकोमा यस कार्यमा खट्ने सबैलाई धन्यवाद दिनुभयो ।

सोही अवसरमा धवलागिरि गाउँपालिकाका अध्यक्ष प्रेमप्रसाद पुनले ‘स्थानीय स्रोतको उपयोग, स्वामित्व र सहभागिता, पूर्णखोप पालिका हाम्रो प्रतिबद्धता’ लेखिएको व्यानर वाचनसहित प्रतिबद्धता जनाउँदै आगामी दिनमा पनि गाउँपालिकालाई पूर्णखोप सुनिश्चिता कायम गराउने बताउनुभयो । उहाँले मानव स्वास्थ्य र स्वस्थ जीवनका लागि खोप निकै महत्वपूर्ण रहेको बताउँदै आगामी दिनमा पनि खोपलगायत गाउँपालिकाबाट सञ्चालन हुने कार्यक्रमहरुमा सबैको सहयोग हुने अपेक्षा समेत गर्नुभयो ।

कार्यक्रममा धवलागिरि गाउँपालिकाका उपाध्यक्ष रेशम पुनमगर, प्रदेश जनस्वास्थ्य कार्यालय म्याग्दीका प्रमुख भुवन ठकुराठी, धवलागिरि गाउँपालिकाका प्रमुख प्रशासकीय अधिकृत मोतिप्रसाद अर्याल र गैरसरकारी संस्था महासंघका पूर्व अध्यक्ष एवं कदम म्याग्दीका अध्यक्ष हरिप्रसाद पौडेलले मन्तव्य व्यक्त गर्नुभएको थियो । गाउँपालिका अध्यक्ष पुनको अध्यक्षता र स्वास्थ्य शाखा प्रमुख क्षत्रीको सञ्चालनमा सम्पन्न कार्यक्रममा प्रवक्ता एवं वडानम्बर ३ का वडा अध्यक्ष देवेन्द्र रोकाले स्वागत गर्नुभएको थियो ।

उक्त कार्यक्रममा पूर्णखोप पालिका सुनिश्चित घोषणामा सहयोग पु¥याउनुहुने सामुदायिक महिला स्वास्थ्य स्वयंसेविका र फोकल पर्सनलाई प्रमाणपत्रसहित सम्मान गरिएको थियो । कार्यक्रममा पालिका अन्तर्गत विभिन्न स्वास्थ्य संस्थामा कार्यरत स्वास्थ्यकर्मी र अन्य कर्मचारीहरुले नृत्य प्रस्तुत गरेका थिए । धवलागिरि गाउँपालिका म्याग्दीसहित गण्डकी प्रदेशमै पूर्णखोप सुनिश्चितता पालिकाको रुपमा घोषित भई पहिलो बनेको दावी गरिएको छ ।

म्याग्दीमा कार्यरत निजामती कर्मचारीहरूले प्रमुख जिल्ला अधिकारीमार्फत संघीय संसद सचिवालयमा विभिन्न ११ बुँदे मागपत्र बुझाएका छन् ।

संयुक्त ट्रेड युनियनको नेतृत्वमा कर्मचारीहरूले प्रजिअ गुरुदत्त ढकालमार्फत सभामुख देवराज घिमिरेलाई कर्मचारी संगठनहरुले यसअघि भएका सहमति, सम्झौता र अदालतले दिएको आदेशलाई समेत समेटेर तत्काल संघीय निजामती ऐन जारी गर्न माग गरेका हुन् । संघीय निजामती ऐन जारी गर्नुपर्ने मुख्य मागसहित संघर्ष थालेका निजामती कर्मचारी आवद्ध संघ संगठनले ११ बुँदे मागबाट ध्यानाकर्षण गराएको नेपाल निजामति कर्मचारी यूनियनका सभापति सुमन सुवेदीले बताउनुभयो ।

नेपाल निजामति कर्मचारी संगठनका म्याग्दीका अध्यक्ष सोमबहादुर केसी, नेपाल राष्ट्रिय कर्मचारी संगठनका अध्यक्ष त्रिबिक्रम शर्मा संघीय ऐन जारी नहुँदा मुलुकको सार्वजनिक प्रशासन अन्योल र अस्थिरताको भुमरीमा परेको ऐन निर्माण गर्दा विगतमा पेश गरिएका ८५ बुँदे माग, २०७८ माघ १२ गते सर्वोच्च अदालतले संघीय निजामती सेवा निर्माण गर्दा पालन गर्नु पर्ने निर्देशनात्मक आदेश र स्थानीय तहका कर्मचारीको आन्दोलन पश्चात नेपाल सरकार र राष्ट्रियस्तरका ट्रेड युनियनबीच २०८० असोज २७ गते भएको सम्झौतामा उल्लेख भएका मागहरू समावेश गर्न पुनः संवाद गरी विधेयक समितिको सुझावसहित प्रतिनिधिसभाको प्रथम बैठकभन्दा अगावै पेश गर्ने लगायत रहेको छ ।

मागहरुलाई सरकार र संसद उदासिन भई सुनुवाइ नगरे संयुक्त ट्रेड युनियन सञ्जालको तर्फबाट थप आन्दोलनको कार्यक्रम सार्वजनिक गर्न बाध्य हुने समेत कर्मचारीले चेतावनी दिएका छन् ।