बेरोजगार भएर घरमै बस्नुभएको छ ? ढुक्क हुनुहोस् अव तपाईले आफ्नो गाउँघरमा काम गर्ने गरी निश्चित समयका लागि सरकारले रोजगारी दिने भएको छ। राष्ट्रिय जनगणनाका लागि म्याग्दी जिल्लामा गणक तथा सुपरीपेक्षक पदमा दरखास्त आव्हान भएको छ ।

म्याग्दीका ६ वटै स्थानीय तहको ४५ वडामा करारमा गणक तथा सुपरीवेक्षक भर्ना आवेदन आव्हान गरिएको कार्यालय प्रमुख घनश्याम सापकोटाले बताए ।‘आफ्नै गाउँमा बसेर काम गर्ने अवसर छ,‘योग्यता पुगेकाले अवसरको सदुपयोग गर्नुहोला’ प्रमुख सापकोटाले भने ।

उनका अनुसार जिल्ला भित्रका सबै वडाको घरदैलोमै पुगेर तथ्याङ्क संकलन सहितका विवरण लिन गणक १ सय ८२ र सुपरीपेक्षक ४२ जनाका लागि अनलाइनमार्फत् दरखास्त आह्वान गरिएको बताए । गणकले १२ कक्षा र सुपरीपेक्षकले स्नातक तह उत्र्तिणा गरेको हुनुपर्ने कार्यालय प्रमुख सापकोटाको भनाई छ ।

गणकले १५ दिन सेवा गरेबापत २६ हजार २ सय र सुपरीपेक्षले २० दिनको ५६ हजार ४ सय सुविधा पाउने जनाइएको छ । सुपरीपेक्षले २० दिन घरपरिवार सूचिकरण र गणकहरु गरणा गरिरहदाँ साथै रहनुपर्ने छ । दरखास्तका लागि केन्दीय तथ्यांक विभागको वेवसाइट तथा केन्द्रीय तथ्याङ्क विभागको वेवसाइटमा गएर भर्न सकिनेछ ।

गणक र सुपरीवेक्षक स्थानीयलाई प्राथमिकता दिइएकाले स्थानीय तहमा समेत सुचना गरिएको छ । तथ्याङ्क संकलनका लागि गणक एकपटक हरेक घरधुरीमा पुग्नुपर्ने छ भने सुपरीवेक्षक दुईपटक प्रत्येक घरमा पुग्नुपर्ने भएकाले पनि सेवासुविधा धेरै भएको राष्ट्रिय जनगणनाका लागि म्याग्दीले जनाएको छ ।

यसपटक मानिसको जनगणनाको अलावा व्यवसायिक प्रयोजनका लागि पालिएका पशुपन्छीको समेत गणना गरिनेछ । अघिल्लो जनगणनामा भन्दा यसपटक थप प्रश्नहरु राखिएकाले गणकलाई आवश्यक तालिममै प्रष्ट सहित विवरण ल्याउन सक्ने बनाउने कार्यालयले जनाएको छ। वडा कार्यालयमा गएर सामुदायिक प्रश्नावली भर्नेछन् । सामुदायिक प्रश्नावलीले नागरिकको सरकारी सेवा सम्बन्धि पहुँच र विपत्त सम्बन्धि जानकारी प्राप्त हुन्छ ।

करारका जनशक्ति अपुग भएमा स्थानीय सार्वजनिक विद्यालयका शिक्षक र सरकारी कर्मचारीको प्रयोग गरी जनणना गरिने भएकाले सकेसम्म क्याम्पस तहमा अध्ययनरत विद्यार्थीलाई अवसरको सदुपयोग गर्न अनुरोध सहित म्याग्दी बहुमुखी क्याम्पसमा समेत पुगेर अभियानका बारेमा जानकारी गराइएको छ।गणनामा तथ्यगत, विश्वसनीय र भरपर्दो तथ्यांक संकलनका लागि जिल्लादेखि वडासम्म चार तहको समिति समेत बनाइएको छ ।

यो लिंकमा गएर आवश्यक कागजात अपलोड गर्नुहोस्: राष्ट्रिय जनगणना,  २०७८ का लागि गणक तथा सुपरीपेक्षक पदमा दरखास्त 

थप जानकारीका लागि: टोल फ्रि नं ११७८

कोभिड १९ विरुद्धको खोप अभियानको दोस्रो चरणमा म्याग्दी जिल्ला भित्र ६५ वर्षमाथिका ७ हजारभन्दा बढीले खोप प्राप्त गरेका छन् । जिल्लाको ६ वटै स्थानीय तहमा रहेका चौकीबाट ज्येष्ठ ७ हजार ४० जनालाई खोप प्रदान गरिएको स्वास्थ्य कार्यालय म्याग्दीले जनाएको छ ।

पहिलो चरणको खोप अभियानको तुलनामा दोस्रो चरणमा उत्साहजनक सहभागिता देखिएको थियो । गण्डकी प्रदेश सरकारले उपलब्ध गराएको खोपलाई जिल्लाका सबै स्थानीय तहका वडास्तरमै स्वास्थ्यकर्मीको उपस्थितीमा लगाइएको स्वास्थ्य कार्यालय म्याग्दीमा निमित्त प्रमुख एकनारायण लम्सालले बताए ।

‘अपुग भएका ठाउँमा पठाइएको छ,‘ज्येष्ठ नागरिकको उपस्थितीले निकै उत्साहित छौ,‘खोप प्राप्त गरेको केही व्यक्तिहरुमासामान्य असरहरु देखिएपनि कसैलाई पनि जटिल स्वास्थ्य समस्या देखिएन’ प्रमुख लम्सालले भने । अन्नपूर्ण गाउँपालिका-८, राम्चे र मालिका–६ दरबाङमा थप खोप पठाइएको छ भने खोप नपुगेर छुटेकालाई खवर गर्न समेत अनुरोध गरिएको छ ।

दोस्रो चरणमा मालिका गाउँपालिका-६, दिच्यामका १०७ बर्षिया ओमलाल निउरे, मंगला गाउँपालिका–३, सातबिसेकी १०५ बर्षिया आसिमा रोका लगायत सतक नाघेका ३ जना र लक्षित उमेर समुहकाले खोप लगाएका छन् । खोप लगाउन आउनेलाई स्थानीय तहले निशुल्क सुविधा उपलब्ध गराएको थियो । यसअगाडी पहिलो चरणमा स्वास्थ्यकर्मी, चिकित्सक, नर्स, स्वयंसेविका, एम्बुलेन्स चालक र सरसफाइकर्मी, दोस्रो चरणमा कर्मचारी, पत्रकार र जनप्रतिनिधिलाई खोप लगाइएको हो ।

म्याग्दीको मंगला गाउँपालिकामा सुनौलो हजार दिनका आमाले पोषण पाएका छन् । सुनौलो हजार दिनको अवस्थामा पोषणको अतिआवश्यक पर्ने पोषण, लत्ताकपडाको अभावमा आमा र बच्चाको स्वास्थ्यमा आउन सक्ने समस्यालाई मध्यनजर गरी सञ्चालन गरिएको ‘उपाध्यक्षसँग हजार दिनका सुत्केरी आमा’ अभियानमार्फत वितरण गरिएको हो ।

बुधबार गाउँपालिकाको वडा नं ३ मा गाउँपालिका उपाध्यक्ष सिर्जना केसीले हजार दिनका आमा र बच्चालाई विशेष ख्याल गर्ने गरी अभियान सञ्चालन भइरहेको बताईन् । ‘पोषणयुक्त खानासँगै सचेतनामुलक कार्यक्रमलाई समेत अगाडी बढाएका छौ,‘आमा र बच्चाको सुरक्षामा आवश्यक पर्ने सहयोगका लागि प्रतिबद्धत छौ’ उपाध्यक्ष केसीले भनिन् ।

हजार दिनको अवधिमा बच्चाको बृद्धिविकास धेरै हुने भएकाले स्याहारसुहार, सरसफाई, खानामा ध्यान दिन अनुरोध समेत गरिएको उपाध्यक्ष केसीको भनाई छ । सोही अवसरमा वडा अध्यक्ष कविन्द्र रोकाले पोषण सुधारका लागि उत्प्रेरणा जगाई पोषिलो खानेकुराको उपभोगमा वृद्धि ल्याउने बताए ।

यता ‘उपाध्यक्षसँग हजार दिनका सुत्केरी आमा’ कार्यक्रमले महिलालाई जनप्रतिनिधिसँग जोड्न सजिलो भएकाले यसलाई सबै वडामा नियमित तथा उक्त अभियानमा महिलाको गुनासो र आवश्यकतालाई समेत समेटेर आगामी बर्ष थप योजना सहित अगाडी बढ्ने गाउँपालिकाले जनाएको छ । महिलालाई आजआर्जनसँग जोड्ने गरी स्वास्थ्य र पोषण अवस्था सुधारका लागि गुरुयोजना निर्माण गरिने छ । पा

छिमेकी मुलुक उत्तर–दक्षिण जोड्ने राष्ट्रिय गौरवको आयोजना बेनी–जोमसोम–कोरला सडक र निर्माणाधीन विद्यालय भवनको अनुगमन भएको छ । जिल्ला समन्वय समिति म्याग्दीका प्रमुख देवेन्द्रबहादुर केसीको नेतृत्वमा बुधबार सडक आयोजनासहित विद्यालय भवनको स्थलगत अनुगमन र निरीक्षण गरिएको हो ।

समन्वय प्रमुख केसी नेतृत्वको उक्त टोलीले हिमालपारीको जिल्ला मुस्ताङलाई जोड्ने राष्ट्रिय राजमार्ग बेनी–जोमसोम–कोरला सडकखण्डको म्याग्दी खण्डमा अनुगमन गरेको जनाएको छ । टोलीबाट म्याग्दीको बेनी नगरपालिका–९, गलेश्वरदेखि रघुगंगाको चमेरे, तिप्ल्याङ, अन्नपूर्ण गाउँपालिकाको केन्द्र पोखरेबगर हुँदै भूरुङ–तातोपानी र दाना भएर काभ्रेभीर क्षेत्रमा अनुगमन गरिएको थियो ।

उक्त खण्डमा निर्माणाधीन कालीगण्डकी करिडोर सडक, कालीगण्डकी नदीमा तटबन्ध निर्माण, रघुगंगा–१, बेखखोलास्थित तिप्ल्याङको कालीगण्डकी नदी र अन्नपूर्ण–२ भूरुङ–तातोपानी जोड्ने पक्की मोटरेबल पुलको समेत अनुगमन भएको छ ।

भूरुङ–तातोपानी क्षेत्रमा कालीगण्डकी नदी किनारमा निर्माणाधीन नदी तटबन्धको काममा न्युन सङ्ख्यामा मजदुरको परिचालन र ढिलाई भैरहेको देखिएको हुँदा सम्बन्धित निर्माण व्यवसायी र आयोजनाको ध्यानाकर्षण गराइने जिल्ला समन्वय समिति प्रमुख देवेन्द्रबहादुर केसीले बताए ।

यसैगरी कालीगण्डकी करिडोरअन्तर्गत सडकको स्तरोन्नतिको काम सन्तोषजनक देखिएको बताउँदै प्रमुख केसीले यसलाई समयमै निर्माणसम्पन्न गर्नुपर्ने आवश्यकता रहेको बताएका छन् । उनले विकास निर्माणका काममा सबै क्षेत्रबाट रचनात्मक सहयोगसहित स्थानीयको तर्फदेखि खबरदारी गर्न आवश्यक रहेको भन्दै वर्षात्को समय अगावै निर्माणको काम सक्नका लागि आयोजना र ठेकेदारले कामलाई तीव्रता दिनुपर्नेमा जोड दिए ।

त्यस्तै दानाको ज्ञानप्रकाश र नारच्याङको प्रभा माविमा निर्माणाधीन चारकोठे विद्यालय भवनको कामले गति लिएको प्रमुख केसीले बताए । जिल्लामा भैरहेका विकास निर्माणका योजनासहितका कामलाई गति दिनका लागि निरन्तर अनुगमन गरिने जनाइएको छ ।

लामो प्रयाससँगै सदरमुकाम बेनीबजारको प्रवेशद्धार कालीपुल बसपार्कलाई वहुवर्षीय योजनामा समावेश गरिएको छ। २१ करोडको विस्तृत परियोजना प्रतिवेदन (डीपीआर) तयार गरिएपनि हरेक बर्ष न्यून बजेटका कारण गति लिन नसकेको अवस्थामा सहरी विकास मन्त्रालयले ५ करोडको बजेट प्राप्त भएसँगै स्मार्ट बसपार्क बनाउने अभियानलाई ठूलो सफलता मिलेको बेनी नगरपालिका–८ का वडा अध्यक्ष रामकृष्ण बराईलीले बताए ।

‘आजभन्दा ४ बर्ष अगाडीको प्रयासले सफलता प्राप्त गरेको छ,‘अब बेनीबजारमा सुविधासम्पन्न बसपार्क बन्छ ’ वडा अध्यक्ष बराईलीले भने । उनका अनुसार चालु् आ.ब. ७७÷७८ मा संघिय सरकारबाट ५० लाख, प्रदेश सरकारबाट ५० लाख र बेनी नगरपालिकाबाट ३४ लाखबाट निर्माणको काम भइरहेको छ ।

बेनी–जोमसोम तथा कोरला सडकको मुख्य प्रवेशद्वार कालीपुल बसपार्कमा ५० लाख विनियोजन भएकाले आयोजनालाई अगाडि बढाउन जटिलता भएकाले बहुवर्षीय योजनामा समावेशका लागि प्रतिनिधिसभा सदस्य भुपेन्द्रबहादुर थापाले सहरी विकास मन्त्रालयलाई अनुरोध गरेका थिए ।

सांसद थापाले बहुबर्षिय योजनामा बसपार्कलाई समेट्न नसके अपूरै रहने जोखिम भएकाले बहुबर्षिय ठेक्का लगाउने ब्यवस्थाका लागि निवेदन नै दर्ता गराएका थिए । सांसद थापाको प्रयासले यो कार्यमा गति लिएको बेनी नगरपालिका स्रोतले जनाएको छ ।

म्याग्दी र मुस्ताङ आवतजावत गर्नेले बेनीको प्रवेशद्धारमै ठेक्का अनुसार समयमै काम सम्पन्न हुने सकेको छैन् । पक्की नाली सहित पक्कीपुलदेखि पेट्रोलपम्पसम्मको सडक कालोपत्रका लागि ढिलासुस्ती र पर्याप्त बजेटको अभावका कारण सास्ती हुने गरेको अवस्थामा पछिल्लो समय अलपत्र काममा समेत प्रगति भइरहेको छ ।डीपीआर\File

बसपार्कको गुरूयोजनामा टिकट काउन्टरलाई एउटै भवन, पार्किङस्थल, बसपार्क नजिक रहेका टहरा, पेट्रोल पम्प विस्थापन, पर्यटन सुचना केन्द्र साना र ठुला सवारीसाधन आवतजावत गर्ने मार्ग, टर्मिनल भवन लगायत नमूना बसपार्क बनाउन आवश्यक पर्ने पूर्वाधारसहितको संरचना बनाउन प्रस्ताव गरिएको छ ।

कालिपुल क्षेत्रको अव्यवस्थित बसपार्क, धुलाम्मे सडक र जथाभावि फालिने फोहोरले बाहिरी जिल्लाबाट ओहोरदोहोर गर्ने यात्रुले म्याग्दीको नकारात्मक सन्देश प्रवाह गर्ने गरेको भन्दै जिल्लामा आउने प्रदेश र संघीय सांसदलाई समेत बजेटको माग गरिएपनि सुनुवाई हुन नसकेको स्थानीयबासीको गुनासो छ। बसपार्क क्षेत्र साँघुरो र अव्यवस्थित तवरले सवारीसाधन पार्किङ गरिदाँ कुरूप देखिएको छ । करिव २७ रोपनी क्षेत्रफलमा बसपार्क फैलिएको छ ।